Nongpoh, Rymphang, 07: U Bah Damanbait Lamare kyrtong ka NPP na Umroi Constituency mynta ka sngi u la ong ba kum u kyrtong u ba la mih shakhmat ban aireng ha kane ka elekshon ba mynta na Umroi Constituency u don shibun ki jingangnud ban wanrah ki jingkylla haka thaiñ Umroi naduh ki surok, ka pule ka puthi, ka iohkam iohjam ki samla, ka jingeh ki nongrep bad kiwei kiwei ki jingdonkam ba hakhmat jong ki paidbah, haba kren haka jingïalang paidbah jong ka NPP mynta ka sngi ha madan jong ka shnong Kyrdem Nongthymmai bala pynlong da ka NPYF Kyrdem.
U la ong ruh ba kum u kyrtong u sngew ioh mynsiem ha kane ka kynti ba mynta ryngkat ka jingkyrmen skhem ban rah ïaka jingjop na Umroi Constituency, watla bun ki briew ki kynthoh ba um dei u ba nang ban kren hynrei kum u kyrtong u la pynshai ba u dei u briew u ba kren kham jam haki kam bad um kwah ban shu kular ïaka bneng ka khyndew kaba um lah pat ban ai sha ki paidbah, hynrei ki paidbah kin sa bishar hi lada ki ailad ha kane kynti ba mynta.
“Nga kular hakhmat ki paidbah ba ngan pyntreikam hok ïaki skhim ban wanrah ki kam pynroi ha kane ka constituency bad wat ka tulop kaba nga dei ban ioh ngan ai sha phi ki paidbah ba duk ba rangli bad ki kup shilliang ki sem shilliang naka bynta ka jingbit jingbiang jong ka Constituency” la ong u Bah Damanbait.
La sakhi ruh ha katei ka sngi da ki hajar ngut ki paidbah nongkyrshan naka Raid Madan Kyrdem kila wan ban sngap ïaka jingpynshai bad ki nongrim jong u Bah Damanbait Lamare haka jingdonlang ruh naduh u Bah Sniawbhalang Dhar, u Ma Ngaitlang Dhar, u Bah R Kharbuki MDC ka Umroi, Bah PP Rynghang State General Secretary ka NPYF bad kiwei kiwei ki nongkitkam bad ki nongïalam ba hakhmat ka NPP ha Umroi.
