Wat pynbor ba kren Hindi, pynrung kloi ïa ktien Khasi ha Khyrnit ba 8

Shillong, Ïaïong 11: Ka Voice of the People Party (VPP) ka ong ba ha ka jaka ban pynbor ïa ka jaidbynriew Khasi ban pule bad thoh ïa ka ktien Hindi ha ka jylla, ka sorkar India ka la dei ban pynkloi noh ban kynthup ïa ka ktien Khasi ha ka khyrnit ba phra ka riti synshar ka ri India.
Ha ka kyrwoh ba la pyllait mynta ka sngi da u Bah Ardent Miller Basaïawmoit, President, ka la ong ba kam lah ban pdiang satia ban phah hikai beit ban pynlong Compulsory ïa ka Sobjek Hindi ha ki skul haduh Class X, da kaba ai daw ba ka Hindi ka long ka long kaba shitom bha ban pule ïa kito ki bym nang kren ïa kane ka ktien.
Ka Seng ka ong ba kumba ka la mih ha ki lad pathai khubor ba ki Myntri Rangbah jong ki jylla ka thaiñ  shatei lam mihngi jong ka ri India kaba kynthup ïa ka jylla Meghalaya, hapoh ka jingbthah u Myntri ki kam poh ïing ka ri India ki la mynjur ban pynlong ïa ka subject Hindi kum ka compulsory ha ki skul tad haduh ka klas ba 10.
“Ka Voice of the People Party ka sngew ban ong ba kan nym lah ban pdiang ia kane, namar ba ka subject Hindi hi ka dei ka subject kaba shitom bha ban pule ïa kito ki bym kren ïa kane ka ktien, bad kane kan buh jingeh bad kan bankhia ïa ki khynnah pule”, la ong u Bah Ardent.
Ka Seng ka ong ruh ba ha ka jylla Meghalaya hi ka ktien English ka la dei lypa ka ktien ba pyndonkam ha ki ophis bad ki jaka trei bad ka la long ruh ka ktien kren ktien hikai ha ki skul bad ki jaka pule. Namarkata ka jingpynlong ïa ka ktien Hindi kum ka subject ba donkam beit ban pule bad pass ha ki skul kan nang pynkhia shuh shuh ïa ka lyngkor ki khynnah skul.
Ka Hindi ka dei ban long ka subjek kaba lah ban jied (third language) ym satia ka subjek ba dei beit ban shim (compulsory subject). Ka riti synshar ka ri India ka la kdew da kaba shai ba ka ktien Hindi bad English ki la dei lypa ki ktien thoh bad kren ha ka ri. Ka jingkren u Myntri ki kam poh ïing bad ka jingrai ki Myntri Rangbah ki jylla shatei lam mihngi ka long ka jingpynbor ban kren bad thoh da ka ktien Hindi ha ki jylla bym ju kren ïa kane ka ktien ha ki jylla shatei lam mihngi. Kane hi ka la dei ka jingpyrshang ka Sorkar NDA ba la ïalam da ka BJP ban pynkylla ïa ka ri India sha ka ri ba don tang kawei ka riti dustur, kawei ka ktien bad kawei ka jingngeit niam bad kane hi ka la dei lypa ka thong bad ka jingangnud ka RSS ban pynkylla ïa ka ri India sha ka ri Hindu.