Shillong, K’lyngkot, 03: Ha ka kyrteng jong ka Balang Catholic, ka Jyllaniam Bah Shillong, ka Catholic Association of Shillong (CAS) ka la kyrpad ïa ka Sorkar Assam ba ïalam da ka Bharatiya Janata Party (BJP) ban pynkylla noh mardor ïa ka hukum bad ban pynthikna ba ki Khristan kiba im bad kiba shong basah ha ka jylla Assam ki dei ban ïoh ïa ka jingkyrmen bad ka jingshahniah hapoh ka Sorkar ba la pynkup bor da ka riti synshar jong ka ri ha kaba manla uwei pa uwei kin ïaineh ïa ka jingieid ïa la ka ri, ka India bad ïa ka Jylla.
“Da ka jingsngewkhia, ngi pynpaw ïa ka jingpyrshah bad ka jingsheptieng ha ka kyrteng jong ka Balang Catholic halor ka shithi ba la pynmih bad ba la phah da ka Special Branch: Assam Police sha baroh ki Deputy Commissioners of Police (int.) bad ki Superintendent of Police ha baroh ki district jong ka jylla (Assam). Kane ka shithi kaba 16 tarik, Nohprah, 2022 ka kdew ïa ka sobjek, “ka jingpynkylla niam” “Religious Conversion reg”. Kane ka shithi ka kdew ruh ïa ki ar tylli ki jingïalang ba la pynlong da ka tnat ha ka 2 tarik, Naiwieng, 2022 bad ha ka 21 tarik, Nohprah,2022,” la ong ka CAS ha u kyrwoh ba la soi da u General Secretary ka Catholic Association of Shillong (CAS) u Bah Barnabas Nongbah, u State President jong ka All India Catholic Union (AICU) u Bah Bedarius Shylla, u President jong ka Synjuk ki Seng Rangbah (SRS) u Bah Carlus Kharkongor, u President jong ka Shillong Archdiocese Catholic Youth Movement (SACYM) u samla Alwyn Savio Kharkongor.
“Kaei kaba paw na ka jingthoh jong kane ka shithi, ka jingthmu jong ka Sorkar ka long kum ka jingmaham khamtam eh ïa ki ritpaid Khristan ha ka jylla (Assam). Ki hynñiew tylli ki jingtip ba bniah ba la pan da ka Sorkar ki kham pynlong sohpdung ïa ki Khristan ha ka jylla (Assam) da kaba pan ïa ki jingtip kiba bniah halor: ka jingdon jong ki Ingmane ba thymmai ba la tei hapoh shi snem, ka jingai jaka na ka bynta ban shna bad ïa ki briew kiba ïadon bynta bad ka Balang, ka jingpynkylla niam ha ki hynriew snem baladep, ka jingdon jong ki Iingmane ba la don lypa, ki Khristan, ka jaka bad kiwei kiwei dei ki daw kiba don jingïadei bad ka jingpynkylla niam, ka jingithuh ïa u briew ba kham pawkhmat bad lada don ka case ha thanat, ki daw ba kongsan halor ka jingpynkylla niam bad ka jingai jingmut kumno ban ïakhun/ïada ki long tang ki jingpyrshang bad ki jingpyntieng ïa ki Khristan,” ong u kyrwoh.
“Ha kaba ïadei bad kane, ka Catholic Association of Shillong, ka la kwah ban kdew ba hapoh ka Article 25, 26, 27 bad 28 jong ka Riti Synshar ka ri India, baroh ki nongshong shnong jong ka ri India ki dei kiba la aibor da ka aiñ katkum ka hok ban mane laitluid,” ong u kyrwoh bad bynrap, “shuh shuh ka shithi ka paw ba ka long shilinag namarba katto katne ki tnat treikam hapoh ka Sorkar ki kwah ban pynlong sohpdung ïa ki Khristan khamtam teh da kaba pan ïa ki jingtip kiba bniah ïa kiba katkum ka aiñ kim shong nongrim satia. Ki jingpan jingtip kiba bniah ba la pan ha kaba ïadei bad ki Khristan, ka jaka bad ïa ka jingpynkylla niam ka long tang ka jingpyrshang ban pyntieng ïa ki Khritan kiba im ha ka jylla (Assam).”
Ka CAS ka la ong ruh ba ka shithi jong ka tnat Pulit ka kdew ïa ka jingbym pynshong nongrim jong ki katto katne ha kaba ïadei bad u synñiang u bynhei ba ka Balang ka la leh ha ka imlang ka sahlang jong ka jylla Assam. “Namarkata, ka Association ka kyntu ïa ka Sorkar Pdeng lyngba ka tnat Kam Pohing ban pynthikna ba kum kine ki jingpyrshang ban pynlong sohpdung ïa ki ritpaid Khristan dei ban pynsangeh noh shisyndon hynrei dei ban ai ïa ki lad jingiada. U synñiang jong ki shlem treikam ki Balang Khristan la ka long ha ka koit ka khiah, ka pule ka puthi, ka jingkiew ka ïoh ka kot bad ha ka kolshor dei ban ñiew kum ki kam kiba bha,” la bynrap ka CAS.
