Ïohrah ka Real Mythic FC ïa ka song pisa ba 1.50 Lak jong ka (L) Jien Pyngrope Memorial Cup 2022

Shillong, Nohprah 14 : Ka Real Mythic FC kaba dei ka club ïalehkai phutbol na Smit ka la ïoh rah ïa ka nam lahduh bad khur ïa ka song pisa ba 1,50,000 tyngka ryngkat ka trophy jong ka lympung ïalehkai phutbol ba la tip kum ka (L) Jien Pyngrope Memorial Cup 2022.
Ka Real Mythic FC ka la ïoh rah nam lahduh hadien ba ka la pynliem noh da 2-1 kol pyrshah ïa ka Jongksha SC ha ka jingïakhun phainal hynne ka sngi Balang ha ka madan ïalehkai ha shnong Jongksha. Ïa katei ka lympung ïalehkai ba la pynïaid da ka Mawkynrew Cup Committee la pynhap pyrda noh da u Bah Banteidor Lyngdoh Myntri ka tnad ïalehkai jong ka sorkar jylla ha kajuh ka por u MLA jong ka Mawkynrew Constituency kum u Kongsan ha ka jingïadonlang u Bah Gavin Mylliemngap MLA ka Sohra Constituency kum u symbud kongsan.
Haba phai sha ka jingïalehkai phainal hapdeng kitei ki ar tylli ki team ka jingïalehkai ka long kaba ïakhaid bad shongshit bha da ka jingwan sakhi da ki hajar ngut ki paidbah jong katei ka dong ka thaiñ ba kynthup naduh ki rangbah, longkmie, samla haduh ki hep kiba rit.
Ha kane ka jingïalehkai, ka Real Mythic FC ka la ïoh ban plie pyrda nyngkong ha ka jingïalehkai ba dang ïaid 1 minit ba la thep da u Pynshailang Kharsyntiew, hynrei ka Jongksha SC kaba la ïoh mynsiem bha khamtam kaba ïakhun ha la ïing khlem kynran dien ka la ïakhun tyngeh bad dei ha ka minit ba 34 u Joseph u la ïoh ban thep ïa ka kol pynïakhaid.
Da katei ka jingïoh thep mar shi kol, ka jingïalehkai ka la nang itynnad ha kaba ki rangïalehkai ki la pyni ïa la ki jong ki sap ïalehkai kaba itynnad bad pynshoh biej ïa ki paidbah nongpeitkai. Ka jingïoh ban pynshat bad pyllait bol ka long kaba mar ïabiang, hynrei haduh ba ki 90 minit baroh ar ki khlem ïoh shuh ban thep kol.
Ka jingïalehkai ban ïoh khur ïa ka nam lahduh kam pat shym la kut, ha kaba u referee u la ai por biang sa da ka extra time bad ha kine ki minit ba dang sah ruh baroh ar ki nang ïakhun tyngeh ban ïoh rah ïa ka nam jop. Dei ha ka minit ba 98 u Batskhem Thangkhiew u la ïoh ban thep ïa ka kol pyntam na bynta ka Real Mythic FC.
Ka Jongksha watla ka la pyrshang da la ki buit ïalehkai hynrei haduh kaba kut ka khlem lah shuh ban pynphai kol ha kaba ka Real Mythic FC ka la pynliem da 2-1 kol bad rah syndon ïa ka nam lahduh.
Ka Jongksha SC kaba wan ba ar ka ïoh khur ïa ka song pisa ba 80,000 tyngka ha ryngkat ki trophy. Ha kane ka sngi na ka liang u Bah Banteidor Lyngdoh u la pynkup burom ruh ïa ki hynñiew ngut ki rangïalehkai jong ka thaiñ Mawkynrew kiba mih madan ha ki league ïalehkai jong ka Shillong Sports Association bad kiba la mihkhmat ruh ïa ka jylla sha ki national level.
Haba ai jingkren u Bah Banteidor Lyngdoh u la pynpaw ka jingsngewkmen ban sakhi ïa kane ka lympung ïalehkai bad ïathuh ruh ba kiba bun ki samla jong ka dong ka thaiñ ki la ïoh ban ïalehkai bad ki club kiba pher bapher ha Shillong bad mihkhmat ruh ïa ka jylla lyngba ka jingpynlong ïa kiba kum kine ki jait jingïalehkai kynthup ka Mawkynrew Cup.
U la ong ba kum u MLA un ïai don ryngkat bad nang kyntiew shuh shuh ïa ki jingïalehkai sport ha ka dong ka thaiñ bad ha ka jylla hi baroh kawei. U la ïathuh ruh ba ha ka 21 tarik mynta u Nohprah un sa plie ïa u Mawnongrim ban shna ïa ka Indoor Multi Complex ha Umkoi kaba la ïoh lyngba ka Khelo India ba kot 8 klur tyngka.
Na ka liang u MLA u kyrmen shkem da ka jingdon ki jaka ïalehkai ka thaiñ Mawkynrew kan sa ïoh ban sei ïa ki nongïalehkai kiba kynsai ban mihkhmat ïa ka thaiñ, ka jylla bad ïa ka ri India hi baroh kawei. Ha kajuh ka por u la pynpaw ruh ka jingai khublei ïa ka Mawkynrew Cup Committee kiba la trei shitom miet la bad sngi ban pynbit pynbiang na bynta kane ka lympung ïalehkai bad kumjuh ruh ïa baroh kiba la don bynta ha kaban pynlong ïa kane ka jingïalehkai kaba jop.
U Bah Banteidor Lyngdoh ha kane kajuh ka sngi u la ai jingïarap ruh da ki tiar tem (drum) sha ka Jien Pyngrope Music School kaba don ha ka shnong Jongksha. Ha kane ka sngi la ïadonlang ruh u sordar jong ka shnong Jongksha, ki riew pawkhmat jong ka thaiñ bad kiwei kiwei kiba la shah khot sngewbha.