Kut noh ka jingïaid lynti ki thei ïalehkai kriket ka Meghalaya ha ka U-19 Women’s One Day Trophy

Shillong, Nohprah 14 : Ka jingïaid lynti jong ki thei ïalehkai kriket ka Meghalaya ha ka U-19 Women’s One Day Trophy ka la poi noh sha kaba kut hadien ba ka la rem da 203 ron ha ka Punjab kaba dei ruh ka jingïalehkai kaba khatduh na ka Group A ha ka jingïalehkai hynne ka sngi Balang ha New Delhi.
Ka Punjab ka la jop ïa ka jingkynting pisa bad kam ban tied nyngkong ha kaba ka la kamai 268 ron duh noh 7 wicket ha baroh ki 50 over shwa ba kan shim ka pali kawang bol bad pynhap lut baroh ki wicket ka Meghalaya bad ai kamai tang 65 ron.
Ka Punjab ka bat kyrdan ba ar na ka Group A katba ka NRR (Baroda) ka ïoh ban bat ha ka kyrdan ba nyngkong. Ka Ankita Sharma ka ïoh 2 wicket ai kamai 41 ron na bynta ka Meghalaya, katba ka Suriti Kumari Ray (1/38), Neelam Roy (1/68) bad ka Awesa G Momin (1/69) ki ïoh mar shi wicket.
Ka Roy, Ray bad ka Blaridahun Lyngdoh baroh lai ngut ki pyndep ha kane ka tournament da kaba khur mar hynriew wicket. Ka Blaridahun kaba ïalehkai tang shisien na ki sansien ka la pyndep ha ka average kaba 12.83 bad ka strike rate ba 18.00. Ha ka pali tied, kiba la kamai bun ron ki kynthup ka Ankita (15), Monica Lyngdoh Phawa (11) bad ka Awesa (10).