Nongpoh, Nohprah 12: Namar ka jingud jingnam jong ki paidbah halor ka jingpynsahteng u kontraktor ban siang rong pyndep ïa u surok na Umsning shaduh Zero Point, ki nongïalam jong ka RBYF Kyrdem Kulai Circle mynta ka sngi kila leit ban pynlong ka jingjurip ïa ki bynta ba sahteng jong utei u surok kaba la pynsyrtok shikatdei ïaki paidbah haka leit ka wan namar ka khohruh khohram. Ha katei ka jingleit jurip la lamkhmat da u Bah Borning Nongbsap Assistant Finance Secretary kla RBYF sengkmie haka jingdonlang ki nongïalam jong ka Kyrdem Kulai Circle kiba la pynpaw ka jingsngewkhia kaba jur halor ka jingpynsahteng u kontraktor ban siang rong pyndep ïa u surok mynta la kham slem ba um pat lah ban pyndep bad ieh sah haduh kine ki sngi.
U Bah Borning Nongbsap, u la ong ruh ka jingjngai jong utei u surok ka don kumba 10 km, ha kaba la dep ruh ban siang rong katto katne bynta, hynrei kaba sngew lyngngoh ka long ba u kontraktor ba pyntrei ïa katei ka kam u la ieh noh bad pynsah sa kumba 2 km khlem pyndep shuh haduh mynta kaba la buh jingeh ïaki paidbah haka leit ka wan namar ka jingsniew palat jong u surok, khamtam ha katei ka thaiñ ki bun ki ophis sorkar, ki jaka jngohkai pyrthei.
Namarkata naka liang ka seng kala kyntu ïaka tnad PWD bad khamtam ïa u MLA ka thaiñ u Bah Jason S Mawlong ba u dei ban shimkhia ban kren sha u kontraktor ba pyntrei ïa utei u surok ba u dei ban pyndep noh mardor naka bynta ban pynsuk ïaki paidbah haka leit ka wan, bad lada kam lah ban pyndep naka liang ka seng kan sa shim pat da kiwei ki lad ki lynti.
