Nongpoh, Nohprah 11: Ka Zarienia Rapsang na Ladsharai kala long ka lahduh haka jingïakop 1st Miss Umsning Constituency 2022 bala pynlong da ka kynhun Mawbyrsiew bad ka Kumnosha Marbaniang na Umbir kala rah ïaka kyrdan 1st Runners Up, bad ka Ilapdianghun Thangkhiew na Umsning Lum Roman kala rah ïaka 2nd Runners Up napdeng 14 ngut ki samla kiba la leit ban shim bynta ha katei ka jingïakop.
Ïa katei ka jingïakop la pynlong haka sngi Saitjaiñ ha Umsning Nongthymmai da ka kynhun Mawbyrsiew ryngkat bad ka Fete da ka jingthmu ban pynmih pisa naka bynta ka kynhun ki samla jong ka shnong bad kumjuh ruh ban sei ïaka sap bad ki thei bhabriew jong ka thaiñ Umsning bala wan ruh ban sakhi da ki paidbah na kylleng ka dong Ri-Bhoi.
La pynphuh pynphieng bad pynbyrngia ruh ha katei ka sngi naduh ki Fashion Show jong ki heprit bad kiba la san, ki kynhun rwai kynhun tem bapher bapher bala pynkhih met ïaki paidbah kiba wan peitkai ha katei ka sngi.
Katei ka samla Zariena Rapsang kan sa leit ruh ban ïakhun ïaka Meghalaya Face 2023 ka ban sa long shen ha Nongbah Shillong.
