Shillong, Nohprah 09 : Ka sorkar jylla ha ka sngi Thohdieng ka la jied ïa ka Khrawsing College kaba don ha Mawngap kum ka Poeple’s College, lane ka college kaban ïoh lang ïa ka jingkyrshan na ka sorkar jylla.
Ïa kane, la leit ban pynbna da u Symbud Myntri Rangbah ka Jylla, Bah Prestone Tynsong ha ka jingïalang kaba long ha katei ka College hynne ka sngi.
“Lyngba kane, kane ka College kan sa ïoh ban ryngkat dor bad kiwei kiwei ki college kiba pawnam ha ka jylla la ka long naduh ka St. Anthony’s College ne haduh ka St. Edmund’s College. Nga ïohi ba ki don bun ki college kiba pynïaid da ki kynhun niam bapher bapher kiba paw bha bad kumta nga ïohi ba ka biang bha ban treilang bad ka sorkar ban wanrah ïa ka pule puthi kaba paka,” u la ong.
Shuh shuh u ong ba dei halor kitei ki nongrim ba ka sorkar ka phaikhmat sha ki college kiba kiew shakhmat bad ïaid katkum ki kyndon ban ïoh ïa kitei ki jingkyrshan na ka sorkar jylla.
Ha kane ka sngi la ïoh ruh ïa ka jingkren na ka Principal jong ka College, Dr. Banida Kharkongor, nangta na ki ophisar ka tnad pule puthi nalor ka jingdonlang u MLA ka Mawphlang, Bah Eugene Lyngdoh, MLA ka Sohïong Bah Samlin Malngiang bad ruh u MDC ka Mawphlang Bah Lamphrang Blah nalor ki Pastor bad ki nongpynïaid ïa katei ka College.
