Shillong, Nohprah 08: Ka samla Stefanie Dkhar na ka shnong Mustoh, Shella, ka la ïoh ban phong ïa ka pansngiat lahduh jong ka Miss Living Roots 2022 ïa kaba la pynlong da ka Tourism Management Committee jong ka Dorbar Shnong Elaka ha ka janmiet sngi Palei ha madan phutbol Tyrna.
Nalor ka jingïakob thei bhabriew, la pynshongkun shuh shuh ïa ka prokram da ki prokram na ki shnong bapher bapher ba don ha ki thaiñ jong ka Riwar Shella kiba la pyni nam ïa ki riam tynrai jong ki.
Ka la don ruh ka prokram ba kyrpang na ki samla Garo, nangta na ka Khneng Cooperative Society, na ka Mawphira bad ruh na ka Mawshamok nalor kiwei kiwei.
Ïa kane ka rynsan la wan ban pynhap pyrda da ka Kong Grace Kharpuri, MDC, ka Kong D Majaw trai jong ka Smoky Falls Resort kum ka Symbud Kongsan nalor kiwei kiwei.
Haba kren bad kum ka Kongsan, Ka Kong Grace ka la ai khublei ïa ka shnong Tyrna kaba la rakhe ïa ka jingdap 125 snem ka jingwan shong shnong thymmai hadien ba ki kynriah shnong na ka jingwan u jumai bah ha u snem 1897.
“Mynshwa ka shnong Tyrna ka pawnam bha ha ka jingdon u sohñiamtra hynrei mynta pat don sa katto katne. Hynrei u Blei u la kyrkhu da kumwei ha kaba da ka jingdon ki jingkieng jri ka la khring bun bha ki nongwan jngohkai pyrthei kiba kylla long mynta ki lad kamai ïa ki nongshong shnong,” ka la ong.
Ka la ong ruh ba da ka jingpynlong ïa kane ka tamasa bun ki nongwan jngohkai pyrthei kin tip kham bun shuh shuh ïa kane ka thaiñ bad khamtam shaphang ki jingkieng jri kiba la pawnam kylleng ka pyrthei.
“Mynta ki la don bun bha ki jaka sah pyngad na bynta ki nongwan jngohkai kiba la aikam Shibun bha ki samla ka thaiñ. Kumta nga kyrmen ba nangne kin sa mih khambun ki resort kiban lah ban ai shuh shuh ka jingmyntoi na bynta ka thaiñ.”
Shuh shuh ka la ong ba ka jingpynlong ïa ka
Miss Living Roots ka ïahap ha bad ka jinglong ka thaiñ.
“Baroh ki nongshim bynta ki don la ka jong ka sap bad kane ka long kum ka jingplie lad ha ki lympung ban sa wan,” ka la ong.
La ïoh ruh ïa ka jingkren na ka Kong D Majaw bad ruh na ka Kong Elena.
