Shillong, Nohprah: Ka Shnong Mawlai Nonglum, Shillong kala pynbeit ba kan don ka jingpynkhuid shnong ha ka 16 tarik mynta u bnai.Kane ka jingpynkhuid shnong ka long ruh shibynta ka jingsdang jong ka ‘Locality Beautification and Enhancement Competition’ jong ka tnat Meghalaya Tourism ryngkat ki bor pynïaid District.
Ka jingpynkhuid shnong kan sdang naduh ka por 8 baje mynstep, bad la kyntu ïa baroh ki kali kiba ïaid na ka Archbishop Dominic Jala Road (Long Round Road), Mawlai Nonglum ba kin ñiah suki bad don akor ïa ki kali khnang ban lait na kino kino ki jingjia ba sngewsih.
Ha ka juh ka por la kyntu ruh ïa baroh ki kali kit ñiut bad kumjuh ruh ïa ki kali kit skum kiba ïaid man la ka sngi lyngba jong ka surok long round road,ba kin da tap bha ïa ki kali khnang ba ki ñiut ki ñier bad skum kin ym hap ha ki lynti surok.
Nalor kata la bthah ruh ïa kito baroh kiba don ïing / jaka hapoh u pud u sam jong ka Mawlai Nonglum ba kin wan ban pynkhuid ïa la ki jaka ha katei ka sngi bad kumjuh ruh ban ïakynduh ïa ki Rangbah Dong jong kito ki dong. Kane ka long katkum u kyrwoh lyngba u Bah WM Lamin, Secretary Mawlai Nonglum, Shillong.
Kumjuh ka Dorbar Shnong Lumkshaid, Shillong ha ryngkat ka jingïatreilang bad ka Shillong Municipal Board kan pynlong ka jingpynkhuid shnong ha ka 17 tarik (sngi Saitjaiñ) ka ban sdang naduh ka por 8 baje mynstep.Kumta la kyntu ïa baroh ki para nongshong shnong ban ïa mih ryntih lang baroh na man la ki thliew ïing kumjuh ruh ia kito ki trai ïing ne trai jaka kiba sah shabar shnong ban ïashim bynta lang ha kane ka jingpynkhuid shnong khnang ba ka jingthmu ban pynlong ïa ka shnong kaba khuid ba suba kan long kaba jop.Kane ka long katkum u kyrwoh lyngba u Bah M.Kharkrang, Secretary.
Ka Dorbar Shnong Jaiaw Laitdom, Shillong kan pynlong ka jingpynkhuid shnong ha ka 17 tarik mynta u bnai (Sngi Saitjaiñ) ka ban sdang naduh ka por 8 baje mynstep haduh ban da dep ka jingpynkhuid.Ka Dorbar ka kyrpad ïa ki nongshong shnong ban ïa mih ryntih ban pynkhuid hala ki jong ki jong ki block kumba ju pynkhuid shnong baroh shikatta.Ha kajuh ka por ka Dorbar Shnong ka kyrpad ruh ïa ki nongñiah kali kiba ïaid ba ïeng ban ïatreilang bad ban ïaishah bad ka dorbar shnong ha ki kynta pynkhuid shnong.Kane ka long katkum u kyrwoh lyngba u Bah HS Suting, General Secretary.
