Tura, Nohprah 05: U Kum shi bynta ban pynjan shuh shuh ïa ka jingshakri ka sorkar ïa ki paidbah, ka sorkar jylla lyngba u Myntri Rangbah ka jylla u Conrad K Sangma ha ka sngi Nyngkong u la plie biang sa ïa kawei ka Sub Divison kata ka Jengjal Civil Sub-Division ha Baljek kaba jngai tang kumba 32 KM na sor Tura bad kane ka jaka ba la plie kaba dei ruh ka constituency u James K Sangma uba bat ruh kum u myntri ka tnat ka koit ka khiah.
“Kane ka sngi kan dei ka sngi ban sah ha ki khana pateng jong ka jylla namar da ka jingplie ïa kane ka shlem treikam ka sorkar kan nang pynjan sha ki paidbah bad ba ki paidbah ruh kin suk haba ki donkam ïa kano kano ka jingdonkam na ki ophis sorkar,” ong u Myntri Rangbah ha ka jingkren jong u.
U la ong ruh ba ka thong da ka jingplie ïa ki Block bad ki Civil Sub Divison ka long ban pynjan shaduh sha tyngkong ïing ban pynsuk ïa ki paidbah.
U la bynrap ruh ba ka sorkar hi ka pyrshang ban bud ïa ka dienjat bad ka thong kaba u Purno Agitok Sangma bad ka jingplie ïa kane ruh ka dei kawei na kita.
“Wat la u Purno um don shuh hapdeng jong ngi hynrei ka thong kaba u angnud ban pyndep na ka liang ka sorkar ka pyrshang ban pynurlong,” u la ong.
Shuh shuh u la ong ruh ba na ka liang ka sorkar ha ki khyndiat sngi kan sa pynbna ïa shikhung heh ki kam pynroi na bynta ka Jengjal ha kaba mynta ki dang don ha ka jingsaiñdur janai.
Ha kane ka sngi u Myntri Rangbah u la plie ruh ïa u Mawnongrim na bynta ka “Integrated Health Complex” ha Jengjal, ïa kaba yn tei ha ka jinglut kaba 32klur bad ka jingaiti ïa ka song pisa sha 60,000 ki long iing ba pynmih marrep na ka skhim Focus plus kaba kot kumba 30 klur
