Kular u MLA ka Mawkyrwat ban weng ïa ka jingeh ki nongkynshew pisa ka Rural Bank
Mawkyrwat, Nohprah, 02: Hadien ka jingmih kiba bun ki jingeh jong ki paidbah kaba ïa dei bad ki kam hapoh jong ka jaka pynlang pisa ne ka bank ha Mawkyrwat Branch, u MLA jong ka Mawkyrwat Constituency, bah Renikton Lyngdoh Thongkhar uba dei u Myntri jong ka tnad umbam umdih u la pynpaw ka jingsngewkhia bad ha kajuh ka por kum u nongmihkhmat u la khot la wer ïa ki paitbah ba kin long kiba ïa treilang khnang ban lah ban weng noh ïa kane ka jingeh na kane ka jingeh kaba ki ïa kynduh.
Na ka liang jong u bah Renikton Lyngdoh Thongkhar mynta ka janmiet haba kren ha ki lad pathai khubor u la kular ruh ba un sa ai da ka kot jingthoh sha bor ba halor jong kane ka jaka pynlang pisa ka Meghalaya Rural Bank (MRB) khnang ban kin lah ban pynbiang ïa ka jingdonkam jong u paidbah bad ha kajuh ka por ba kin pynkha biang ïa ki tnad treikam hangne hapoh ka South West Khasi Hills District khnang ba kan kham pynsuk ïa ki paidbah kiba don ka jingïadei kam bad ki kam pisa pilaiñ.
U la kyntu ïa ki nongtrei jong ka Meghalaya Rural Bank, Mawkyrwat Branch ba kumba ki paidbah ki la ai ka jingshaniah ïa kane ka jaka pynlang pisa ha Mawkyrwat mynta ka la dei ka por ba kin buh kham bun noh ïa ki tnad treikam jong ki Bank khnang ba kan long ka jingmyntoi bad kan ym khapngiah kumba ka long ha kine ki sngi ba mynta.
U la ai jingmut ruh ïa ki paidbah ba kim dei ban shu ïa thynñian eh tang hapoh kane ka jaka pynlang pisa hynrei kin da pyndonkam de da kiwei pat ki lad lyngba ki bank sakhi ba kin lah ban ïarap ha kaba sei ne thep pisa. “Haba thep pisa lyngba ki bank sakhi ruh kim dei ban shu leh kulmar hynrei ki dei ban ïaid da ka lynti khnang ba kan nym buh jingeh”, ong u Bah Renik.
U la kyntu ruh khamtam ïa ki kontraktor bad ki nongkhaïi ba kin pyrshang ban plie account de sha kiwei de ki jaka pynlang pisa bad ki dei ruh ban aplai de da ki Automated Teller Machine (ATM) Card khnang kan lait ban ïa knieh bad ki paidbah namar kumba long mynta kiba bun ki account hapoh Meghalaya Rural Bank (MRB) ki dei ki briew kiba trei ha ki ka kam 100 sngi ne ki Jop Card Holder.