Tura, Naiwieng 29 : Kawei ka jingjia kaba kham phylla bad kaba ym ju ïoh sngew koit ba kan jia ha kane ka jylla Meghalaya ka dei ka jingkem ding jongka thliew ha ka por ba ki briew ka tnad PHE ki dang ksam umdih ha ka shnong Aragittim ha ka Sngi U Blei kaba dei ka skhim Jal Jevan Mission ban pynïoh umdih ha katei ka shnong.
Ki bor synshar kiba la ïohi ïa kane ka jingjia ba phylla ki suba ba lah ban dei ka jingdon ka petrol shapoh ñiamra ha katei ka jaka bad halor kane na ka liang u Magistrate jongka West Garo Hills u bah Gideon Kharmawphlang u la ïathuh ba u la ai jingtip halor kane ka jingjia sha ka sorkar ba kan thoh shaka ONGC khnang ba kan phah iaki briew jongka ban wan bishar bad eksamin ïa katei ka jingjia ha katei ka jaka da ki kor ki bor jongka.
La ïathuh “ Katba ki nongtrei ka tnad PHE ha ryngkat ki engineer bad ki technician ki dang ksam um ha katei ka shnong kynsan kynsan la kem ding ka thliew kat haduh ban da hap ban wan da ki kali pynlip ding jong ki pulit ban pynlip ïa katei ka ding kaba la klang na katei ka thliew ksam um. Hynrei hadien ba la lip ka ding ruh ka um ba sboh sabon ryngkat ka jingthnam ka dang bteng beit ha katei ka thliew. Ki nongksam um ha katei ka jaka ki la sdang ban sheptieng bad phet krad kham shajngai hadien ba la mih ka um ba khluit na katei ka thliew.Kane ka jingjia ka la pynsyier wat ïa ki trai shnong ruh namar kim tip don aiu shapoh niamra” pynkut ka tyllong khubor (UNI).
