Shillong, Naiwieng 29: “Ka jingïaishah ka don la u pud. Ka long kaba suk ban hukum ïa ki Pulit ban siat briew”. Kine ki long ki kyntien kiba la mih na u Myntri Rangbah ka jylla u Conrad Sangma mynta ka sngi ha ka jingïalang bad ki nongthohkhubor.
Hato kine ki long ki kyntien kiba pyni ba u Myntri Rangbah ka Meghalaya u la kren tyngeh ïa ka jylla Assam halor ka jingjia ha Mukroh?. U Conrad u la ong shuh shuh ba ki jingjia ha kine ki shi taïew baladep kidei kiba la jia shaba palat pud.
Lehse ym sngewthuh bha u Myntri Rangbah u thew shano. Hynrei kane ka jingkren u Myntri Rangbah ka jylla ka long halor ka jingkdew jong ki nongthoh khubor ba ka don ka jingkynnoh ba ka sorkar MDA ka tlot palat bad ka shu shah jem beit katba leh ka Assam.
Ha kane ka jubab, u Myntri Rangbah ka jylla, u la ong ba borabor u ngeit ba ka jingïaishah bad ka jingïakren markhmat kadei ka lynti kaba khambha ban poi sha ka jingïasuk. Hynrei u la ong pat ba ka jingïaishah ka don la u jong u pud. “Kiba kynnoh ki lah ban kynnoh, hynrei ki jingjia kiba la jia ha kine ki shi taiew kidei ki jingjia kiba la palat ïa u pud”, u la ong. Lah ban ong ruh ba kane ka jingkren u Conrad kan dei kaba u thew ïa ka Assam, namar haba la kylli halor ka jingïapynbeit pud kaba ar, u la ong ba ïamynta hi kane ka jingïapynbeit la pynsuki shuwa namar ki jingjia ha kine ki sngi baladep bad ong ruh ba shuwa ban sdang biang ka jingïakren bad ka Assam donkam shuwa ka jingïapynbeit bad ka jingïasngewthuh.
