Ka Sorkar kam dei ban shu pynbiej paidbah tangba la jan ka elekshon: President WRBD

Shillong, Naiwieng, 29: U President jong ka Western Ri Bhoi Dorbar uba dei ruh u Rangbah Shnong jong ka shnong ka Patharkhmah u Bah Najim Kharmalki u la pynpaw ka jinglyngngoh ba u Myntri Rangbah ka jylla u Conrad K Sangma u la pynbna ban pynsangeh shwa na ka bynta ban plie ïa ka Patharkhmah Civil Sub Division na ka jingjia ha Mukroh, West Jaiñtia Hills katba ka Sorkar ka ladep pynbna ba la plie ïa ka Civil Sub Division ha ka 24 tarik mynta u bnai.
Haba kren bad u nongthoh khubor u Bah Najim u la ong ka polisi treikam jong ka Sorkar ka pynlyngngoh haduh katta katta ïa ki paidbah ka thaiñ Ri Bhoi Sepngi halor ka jingpynbna jong ka Sorkar ba la plie ïa ka Patharkhmah Civil Sub-Division katba u Myntri Rangbah u la pynsangeh ban plie ha ka 24 tarik kum ka dak ka jingsngew lem ïa ka jingkhlad noh ki san ngut ha Mukroh.
U Bah Najim u la buh jingkylli hato ïa ka jingplie la shu leh na Shillong kumba plie skhim pynroi u Myntri Rangbahduh u Narendra Modi na Delhi ha kiwei ki jylla ka Ri?
U la bynrap wat ki tiar ba la wanrah ban plie ïa katei ka ophis hynrei ha ka 24 tarik la kit biang sha Shillong. “Hynrei kumno ka Sorkar ka pynbna ba la plie ha ka 24 tarik khlem ka jingïalang ne buh mawnongrim,” la buh jingkylli une u President jong ka Western Ribhoi Dorbar.
Ha kajuh ka por u Bah Najim u la pynpaw ka jingkmen ba la plie ïa ka Civil sub division Patharkhmah kaba ki paidbah ki angnud la bun snem bad ka dei ban treikam noh khnang ba ki paidbah ka thaiñ kin suk namar lada ka treikam kim donkam shuh ban leit donkam sha Nongpoh lane sha Shillong.
“Hynrei kaba sngewsih ka long ïoh ka shu don tang ka kyrteng kumba long ha Ranikor haduh mynta ka Civil Sub division ka khlem treikam bad ka Patharkhmah ruh ka lah ban long kumjuh. Kumno kan treikam haba wat tang ka ophis ruh kam don bad ka jaka ba la ai da ka Western Ri bhoi ban shna ophis ki ophisar ki ladep wan thew la slem ban shna ophis hynrei haduh mynta ym pat don dak eiei,” la ong u Bah Najim.
U la ong ka don ka jingïateh bad ka Sorkar ha ka por ba aiti ïa ka jaka ban shna ophis na bynta ka bhah kam bhah jam ki khun samla ka thaiñ bad ka Sorkar ka dei ban shimkhia halor kane ban ai kam ai jam ïa ki trai shnong ïa ki kam ba ki lah ban trei, namar ka jingangnud ki paidbah kam dei tang ban plie hynrei kan long ruh kawei ka lad ai kam ïa ki khun samla ka thaiñ Ri-bhoi Sepngi.
“Ka Sorkar kam dei shu pynbiej kai ïa ki paidbah tang namarba la jan ka Elekshon hynrei ka dei ban pyntreikam noh mardor kumba la pynbna ha ki kotkhubor,” ula bynrap.
Ha kawei pat ka liang, ka jingangnud jong ki paidbah ka thaiñ Patharkhamah ban ïoh ïa ka Civil Sub Division hadien bun bun snem ka la wan urlong mynta ka kynti haba ka Sorkar ka ladep ban pynmih ïa ka jingpynbna ban plie noh ïa kane ka Civil Sub-Division ha ka sngi Thohdieng mynta ka taiew.
U MLA jong ka Jirang Constituency u Bah Sosthenes Sohtun ha ka jingïakren bad u nongthoh khubor u la pynthikna ba ïa ka Civil Sub Division yn plie ha ka sngi Thohdieng da u Myntri Rangbah ka jylla u Conrad K Sangma.
Kane ka Civil Sub Division kan kynthup ïa ki shong kiba hap hapoh ka Administrative Unit ki don hapoh jong ka shnong Jirang C&RD Block kaba don sha sepngi jong ka Ri Bhoi District.