Sngewthamula ba ka sorkar jylla jong ngi ka ïakhun ïaka Assam da ka Internet : Ferdinald Kharkamni

Nongpoh, Naiwieng 24: U Samla Ferdinald Karkamni President ka KSU North Khasi Hills District u pynpaw ka jingsngew bynñiaw halor ka rai jong ka sorkar ban khang ïaka Internet haka jylla kaba long ka jingduhnong kaba khraw ïaki paidbah kiba ju pyndonkam da ka Internet ban kamai ban pyndep ïaki kam ki jam bad khamtam ban lum jingtip kumba ka eksamin kala jan.
U la ong ruh ba ka dang shen kawei naki kynhun sengbhalang ka FKJGP kala pynlong ïaka rally ha Nongbah Shillong halor ka kyrduh kam kyrduh jam ki samla haka jylla bad kaba sngewsih ka long ba ki video ba shu shah bom da u siej ki la pur sted haki internet bad ym shym la khang ïaka Internet, hynrei ka jingiap noh jong 5 ngut ki mynsiem naka liang ka sorkar kala pynsted ban shim rai ban khang noh ïaka Internet bad sngew thamula ban ong ba ka sorkar jylla jong ngi ka ïakhun ïaka Assam da ka Internet.
U la ong ba ka sorkar ka ju pynpaw ruh ïaki jingduhnong lada ki kynhun sengbhalang ki pynlong ïaki prokram ïakhih bapher bapher, hynrei hato ka jingkhang ïaka Internet kam dei ka jingduhnong? La buh jingkylli utei u nongïalam ka KSU ha Ri-Bhoi.
Shuh shuh u la ong ruh ba sngewkmen ba ka sorkar kala shim ïaka rai ban khang ïaki tamasa bapher bapher haka jylla hynrei ki dei ruh ban leit markhmat sha katei ka jaka.
Halor ka jingïaid jong u DGP ban rung shaki shnong ha Nongpoh Shillong dang shen naka liang utei u nongïalam u la ong ba mynta kadei ka kamram jong u DGP ban rung ruh sha ki shnong khappud ka jylla naka bynta ban pynthikna ba ki paidbah ki dei ban shong suk shongsaiñ.