Ka jingjop jong ka NE Olympic Games 2022 ka nuksa ban lah pynlong ïa ka National Games

Shillong Naiwieng 23 : Ka jingjop thiaw jong ka North East Olympic Games 2022 (NEOG-22) kaba dei ka sien kaba ar ba la pynlong ïa kane ka Olympic ka dei baroh ka jingshlur shim rai jong u myntri ka tnad kam sport u bah Banteidor Lyngdoh bad ka jingai mynsiem jongu Myntri Rangbah ka jylla u Conrad Sangma.
Balei ba ong kumne ka dawbah dawsan ka dei ba hynriew bnai shwa ban long kane ka NEOG-22, ka la don ka jingïakynduh lang jong ka tnad kam sport ka jylla hapoh ka jingïalam u Myntri kane ka tnad u bah Banteidor Lyngdoh ha ka jingïadon ryngkat lang ki ophisar naduh u Commissioner jong kane ka tnad u Vijay Kumar, ki nongïalam ka Meghalaya State Olympic Asosiation ba la lam khmat da u bah John F Kharshiing bad ki dkhot ka NEOG bad ha kane ka jingïakynduh u myntri ka tnad kam sport u la ong beit ïa ka kyntien, “Ngin ïaid shakhmat ban pynlong ïa kane ka Olympic kaba jop” Kane ka la ai mynsiem lut ïa baroh ban ïatrei lang bad pynlong ïa kane ka NEOG kaba jop.
Ha katei ka jingïalang haba la ïakren ban pynlong ïa ka NEOG kaba ar, u Myntri ka tnad kam sport u bah Banteidor Lyngdoh khlem pat da ïamir jingmut bad ïakren bad u Myntri Rangbah u la shim beit ïa ka rai ban pynïaid shakhmat ïa kane ka jingïalehkai kata ruh tang hapoh hynriew bnai.
Hadien ba u la shim ïa kane ka rai ka MSOA lem bad ki ophisar jongka tnad kam sport hapoh ka jingïalam u Vijay Kumar ki la pynkhreh ban pynïaid shakhmat ïa ka kam. Ha kaba sdang u myntri Rangbah um pat tip halor kane ka jingpynkhreh bad dei tad hadien ba u Myntri kam Sport u bah Banteidor Lyngdoh u la leit ban ïa kynduh bad ïathuh lut ha u ïa ki rai ba u Myntri Rangbah ruh u la ai mynsiem ba dei ban ïaid beit shakhmat.
Da ka jingïatrei lang hapdeng u Myntri kam ïalehkai bad u Myntri Rangbah lem bad ki ophisar baroh ba la lah ban pynlong ïa kane ka NEOG 22 kaba jop bad kaba la ïoh ka jingïaroh na baroh ki jylla kane ka thain shatei lam mihngi ka ri India.
Naduh ka sngi ba sdang ban plie pyrda ïa kane ka NEOG-22 ha madan jongka SAI ha NEHU haduh ba kut ruh ha ka juh ka jaka ka jingpynlong ïa ki prokram ka la long kaba ïaid beit ïaid ryntih.
Ha ka Sngi ba plie pyrda la ïadon lang u Symbud Myntri Rangbah ka jylla u bah Prestone Tynsong u la long kum u Symbud Kongsan bad u Myntri Rangbah kum u Kongsan bad ha ka sngi ba pynhap pyrda pat la long kongsan biang da u Myntri Rangbah bad u Symbud Kongsan da u Myntri kam Ïalehkai.
Kaba ai mynsiem ïa ki nongïashim bynta ha ka jingïalehkai sport ka dei ka jingpynkhreh pynkhrum kaba nadong shadong ha kaba ym don kano kano ruh ka jingshah ujor ne jingshah kynnoh. Ha ka sngi ba pynkut lei lei ki nongïashim bynta ha ki jingïalehkai sport bapher bapher ki la babe ba kan kut noh namar ki la sngew hun sngewtynnad palat namar ka jingpynkhreh pynkhrum jongka sorkar jylla ka la pynhun palat ïa ki naduh ka jaka thiah jaka dem haduh ka bam ka dih kaba biang.
Ka daw ba kongsan eh jong kane ka jingjop ka dei ba u myntri ka tnad sport u dei u nongïalehkai sport bad u shim khia da shisha ban kyntiew ïa ka kam ïalehkai sport ha ka jylla. Dei ha ka por jongu ba ka jylla ka kiew bha ha ka jingïalehkai sport namar ha u snem 2018 ba ka NEOG ka sdang nyngkong eh ha Manipur ka jylla ka ïoh tang lai tylli ki takma ksiar hynrei mynta ka kynti ka la ïoh haduh 36 tylli ki takma ksiar bad ka la wan ha ka kyrdan kaba saw.
Kane ka jingkiew kyrdan kynsan jong ka jylla ha kane ka kam ïalehkai sport ka dei namar ka jingshim khia jong u myntri ban kyntiew ïa kane ka kam ïalehkai. Ha ki por mynshwa ym ju don ba ithuh ïa kiba wanrah burom ïa ka jylla na kane ka kam ïalehkai sport lada ithuh eh ruh ka jingai burom ka dei beit tang da ki hajar tyngka ka bym ïahap bad ka jinglut hynrei hadien ba u shimti ïa ka tnad la rai ban pynkup burom ïa baroh kiba wanrah burom ïa ka jylla ha ka kam ïalehkai sport da kaba ai ruh ka khusnam kaba heh.
Kumta ka jylla ka donkam ïa kum kine ki nongmihkhmat bad nongïalam kiba shim khia ban kyntiew ïa ka jylla ha ki kam ba ki bat bad synshar bad ki paidbah ruh ki dei ban sngewthuh bad ithuh ïa kiba kum kine kein ki nongmihkhmat ki ban ïalam ïa ka jylla.