Shillong, Naiwieng 20 : Ka Meghalaya ka la shah rem da ka inning bad 38 ron ha ka Jammu and Kashmir ha ki ar sngi ki jingïalehkai jong ka U-19 Cooch Behar Trophy ha ka jingïalehkai hynne ka sngi U Blei ha Mangaldai, Assam.
Ka Meghalaya ka la pynhap lut baroh ki wicket jong ka J&K ha ka jingïalehkai ha ka sngi Saitjaiñ kaba kamai 296 ron, ha kaba ka la beh ïa katei ka thong bad kamai 73 4on duh noh 2 wicket. Hynrei, hynne ka sngi pat ka Meghalaya ka la shah pynhap lut baroh ki wicket da kaba kamai 144 ron ha ka inning kaba nyngkong bad 114 ron ha ka inning kaba ar.
Ha ka sngi Saitjaiñ ka Meghalaya ka la lah ban sdang da kaba lah ban kamai bun ron kata lyngba u Mrinal Das uba kamai 40 ron bad uba la shah pynhap wicket noh ha jingïalehkai kaba jan poi sha kaba kut. Hynne ka sngi pat, u Mrityunjay Bharali u la pyrshang katba lah ban pynneh wicket hynrei u la shah pynhap wicket noh tang hadien ba u kamai 33 ron, katba u Sachin Kumar u la ïarap kamai 25 4on. Ka Meghalaya kam lah ban poi sha ka thong ha kaba ka la hap lut baroh ki wicket da kaba kamai tang 144 ron.
Ha ka inning kaba ar ruh, ka Meghalaya ka khlem lah ban kamai ron, watla sa shisien u Das u la sdang da kaba kamai 28 ron. U Sachin u kamai 19 ron katba u Avinash Rai tang ma u marwei uba la beh haduh kaba kut da kaba kamai 48 ron da kaba khyrwit hynñiew tylli ki four bad kawei ka six.
Ka Meghalaya kan pynkhreh pat ban ïakhun pyrshah ïa ka Karnataka kaban sdang ha ka 26 tarik Naiwieng.
