Nongpoh, Naiwieng 16: Shibynta ka thong ban wanrah ïaka khuid ka suba, ki paidbah jong ka shnong Umtham ha Ri-Bhoi mynta ka sngi kila ioh jingmyntoi shibun hadien ba kila ioh pdiang ïaka iing jaka ban thep ïaki tiar ba lah ban die, ka iing ban thep ïaki ñiut ki ñier kiba lah ban pyut, ki kali kit ñiut bad kumjuh ruh ki jaka bret ñiut man kawei pa kawei ka longiing ha katei ka shnong lyngba ka Swaach Bharat Mission.
Ha katei ka sngi la don ryngkat lang ruh da u Bah Jason S Mawlong MLA ka Umsning kum u kongsan haka jingdonlang u Bah A Lyngdoh SDO ka tnad PHE Umsning Division, u Bah Garland Sun District Co-Ordinator ka SBM, Bah Orbin Nongrang Rangbah Shnong, ryngkat ki nongshong shnong jong katei ka shnong.
Naka liang u Bah Garland Sun kum u District Co-ordinator ka SBM u la pynpaw ba ka long ka jingkyrkhu ïa katei ka shnong kaba la ioh pdiang ïa katei ka iing bad ki tiar ki tar ban wanrah ïaka khuid ka suba jong ka shnong, hynrei kim dei pat ban pyndonkam bakla ïaki hynrei ban sumar naka bynta ka jingdonkam bad ka khuid ka suba jong ka shnong.
U Bah Jason S Mawlong kum u MLA ka thaiñ u la pynpaw ba katei ka shnong ka dei kaba donbok kaba ioh kum kitei ki tiar ki tar, bad ka shong haki nongshong shnong ban sumar bad khamtam ban long ka nuksa ïa kiwei ki shnong ban wanrah ïaka khuid ka suba, naka bynta ka jingitynnad bad khamtam ka jingkoit jingkhiah. U la kyntu ruh ïaki nongshong shong shnong ban don ka jingkitkhlieh naka bynta ban wanrah ïaka khuid ka suba bad kyrpad ruh ïaki ban ai ka jingïatreilang naduh ki ophisar jong ki tnad sorkar, ki nongmihkhmat naka bynta shibun kiwei pat ki kam pynroi ha ka shnong.
