Shillong, Naiwieng, 12: Tang hadien katto katne ba u Myntri Rangbah ka jylla u Conrad K Sangma ula bthah ïa u Chief Engineer ka tnat PWD ban jurip ïa ka surok Sohra tang hapdeng khyndiat sngi ba u la wan hi na Sohra mynta la sdang ïa ka jingsiang rong ïa ka surok ban pynsuk ïa ki nongleit nongwan bad ïa ki nongjngohkai pyrthei kiba ju sngewtynnat ban leit shang kai sha Sohra, ka shnong kaba pawnam bha ha ka jingdon ïa ki jaka jngohkai pyrthei.
Ha ka sngi Saitjaiñ la sakhi ba ka jingsiang rong ka la sdang narum Mawkdok ter ter shaduh Khliehshnong Sohra. Katkum ka jingïathuh jong ki paidbah la ong ba ka jingsiang rong ka la sdang ha kine ki khyndiat sngi.
Kum ban shu pynkynmaw ha ka jingïakynduh jong u Myntri Rangbah ïa u Syiem ka Hima Sohra bad ïa ki Myntri ha ka shnong Mawjrong ki la ïaphylliew jingmut ïa ka jingsniew jong ka surok kaba dei ka surok kaba kongsan tam kaba ki nongjngohkai pythei na bar ri, na bar jylla bad na ka jylla ki ju smat bha ban leit kai sha Sohra.
Ha katei ka jingïakynduh u Myntri Rangbah u la ai ka jingkular ba un phah jurip ïa u Chief Engineer bad hapoh shitaiew yn siang noh ka jingsiangrong ïa kaba mynta ka jingtrei ka la ïaid shakhmat da kaba pyndonkam ki mashin katkum kane ka juk mynta.
Ka jingmang pisa na ka Sorkar ban maramot ïa kane ka surok Sohra ka la long naduh ar snem mynshuwa hynrei ym shym la lah ban sdang ïa ka jingtrei tad haduh ban da shimkhia hi da u Myntri Rangbah ka jylla ban tuklar da lade ïa kane ka kam khnang ban pynsuk ïa ki paidbah ha ka leit ka wan bad ka rah ka rong.
