Mawkyrwat, Naiwieng 12 : Ka lympung ïalehkai kynjatbol jong ki khynnah skul kaba la tip kum ka V Inter-School Football Tournament (I-SFT) 2022 ba la pynïaid da ka Ïalam Sngewbha Football Academy (ISFA) hapoh madan Thangrai ka la poi noh sha kaba kut bad ki skul kiba poi sha ka phainal ki long ka Nongnah SS bad ka Nolikata SS kaba dei jong ki khynnah kynthei.
Haba phai ha ka jingïalehkai, ka long ka jingïaleh kaba ïa khaid bha namar ki long ki ‘thei ïalehkai kiba ïa biang bor bha hynrei hadpeng jong ka jingïaleh pat ka skul Nongnah SS ka lah ban pynliem noh ïa ka skul Nolikata SS da 2 – 0 kol. Nangta, ha ka jingïalehkai jong ki khynnah shynrang pat ka Nolikata SS pyrshah ïa ka Rodphod SS bad ka jingïakhun ka long kaba kham i tynnad shuh shuh hynrei haba kut ka skul Nolikata SS ka long ka kynhun kaba rah ïa ka nam jop.
Ha kane ka sngi lah pynkut noh ïa ka jingïalehkai da ka jingdon ki nonghikai na ki skul bapher bapher kata naduh ki nonghikai jong ka skul Nongnah SS, Rodphod SS bad Nolikata SS.
Shuh shuh la ïoh ban sam ïa ki khusnam da ki nonghikai kaba kynthup babu John Rngaid uba dei u Headmaster jong ka skul Nongnah SS ha kaba ula sam ïa khunsnam sha ki nongjop ha ka liang ki shynrang kaba dei ka skul Nolikata SS bad la ïoh sam sha ki skul ba shah rem noh da u bah Micheal Lyngdoh uba dei u Community Coach ïa ka skul Rodphod SS bad ka Principal jong ka Nolikata SS, kong M. Marweiñ, ka la sam sha ka nongjop jong ki kynthei ka skul Nongnah SS bad u babu K.R. Lyngkhoi uba dei artad u General Secretary jong ka Ranikor Civil Sub Division Sports Association (RCSDSS) uba la sam sha ki kaba wan ba ar ka skul Nolikata SS.
Ïa kane ka lympung ïalehkai kynjatbol la pynshit pynshngaiñ da ka jingïadonlang ki khynnah skul jong baroh ki skul kiba la ai ka jingkyrshan ïa la ki jong ki skulh ha ryngkat ka jingrisa kynhoi. Ka Ïalam Sngewbha Football Academy ha kaba kut jong ka jingïalehkai ka pynpaw ka jingaikhublei ïa baroh ki skul kiba wan ïashimbynta ha kane ka Inter School Football Tournament bad na ka liang ka jong ka ISFA ka kitbok kitrwiang ïa baroh ki khynnah skul ba kin leh bha ha eksam ban sa wan.
