Shillong, Naiwieng 12 : Ka jingïaid lynti jong ka kynhun ki thei ïalehkai phutbol (U-17) jong ka Meghalaya ha ka 2nd North East Olympic Games 2022 ka la poi noh sha kaba kut hadien ba ka Arunachal Pradesh ka la pynliem da 3-1 kol ha ka jingïalehkai hynne ka sngi Saitjaiñ ha madan Third Ground, Polo, Shillong.
Ha kawei pat ka jingïalehkai, ka Sikkim ka la khur jingjop da kaba pynliem da 3-0 kol pyrshah ïa ka Assam ha ka jingïashut tie-breaker hadien ba ki la ïakhaid da 1-1 kol ha baroh ki 90 minit.
Dei ka Assam kaba la thep kol nyngkong lyngba ka Ajuli Brahma ha ka minit ïalehkai ba 45+2, hynrei ka Sikkim ka la ïoh ban pynïakhaid lyngba ka Simran Gurung ha ka minit ba 71 kaba la ïoh ruh ka nam kum ka Player of The Match. Ka jingïalehkai ka la poi shaduh ka jingïashut tie-breaker khlem da ai por tam ha kaba ka Assam ka khlem lah ban wanphai nam jop katba ka Sikkim ka la thep lai kol napdeng ki saw ngut ki thei ïalehkai kiba la shim bynta ha katei ka jingdhut penalty.
Shwa kane, ka Arunachal Pradesh ka la thep kol nyngkong lyngba ka Kai Rumi. Ka Meghalaya ka la duh kawei ka kabu thep kol lyngba ka penalty bad ka Arunachal Pradesh ka la thep sa ka kol kaba ar lyngba ka Angel Tawang ha ka minit ba 22. Ka Gunai Taisik ka la thep sa ïa ka kol kaba lai na bynta ka Arunachal ha ka minit ba 54 katba ka Makrisha Songthiang ka la thep shi kol na bynta ka Meghalaya.
