Lahduh ka Nongkhyriem bad ka Pohktieh ha ka phutbol rakhe Platinum Jubilee ka Nongthymmai SCC

Shillong, Naiwieng 08 : Ka Nongkhyriem ka la ïoh ban khur ïa ka song pisa kaba 20,000 kum ka lahduh hadien ba ka la lah ban pynliem noh da 3-1 kol ïa ka Madanrting ha ka lympung ïalehkai Platinum Jubilee Football Tournament 2022 ba la pynlong da ka Nongthymmai Sports & Cultural Club kum shi bynta ka jingrakhe ïa ki 75 tylli ki snem ka jingïaid lynti ka club.
Ha katei ka jingïalehkai kaba la pynlong ha Madan Nongthymmai Lawjynriew, ka kynhun ki thei ïalehkai jong ka Pohktieh pat ki la lah ban pynliem noh ïa ka kynhun jong ka Umpling da 4-3 kol lyngba ka tie breaker hadien ba ka jingïakhun ha madan ka la kut noh khlem don mano mano ba ïoh ban thep kol.
Haba phai sha ka jingïalehkai jong ki shynrang, ka jingïakhun ha ka kylla step ka la kut noh khlem da don mano mano ruh ba ïoh thep kol hynrei dei tad ynda la poi ka kylla miet ba ka jingïakhun ka la kham shongshit haduh ba ka Nongkhyriem ka la ïoh ban khur ïa ka nam lahduh da kaba ïoh ban thep haduh 3-1 kol.
Ïa ka kol kaba nyngkong ha katei ka jingïakhun la ïoh ban thep da u Youngmin Khriam bad tang hapdeng 1 minit ka Shnong Madanrting kala pynïakhaid noh lyngba ka kol bala thep da u Mark Augustine Wanswett bad katba nang ïaid ka jingïalehkai, ka shnong Nongkhyriem kala ïoh ban thep sa 2 kol lyngba u Ïarbok Kshiar bad jop syndon ïa ka jingïakhun da 3 -1 kol.
Nalor ka song pisa sha ka lahduh bad ka kynhun kaba wan ba ar, ki la sam ruh ïa ka khusnam shimet la ka long naduh ka khusnam nongïalehkai ba kynsai, ba thep bun kol eh, nongap kol ba tbit bad kiwei kiwei.
La ïadonlang ruh ha kane ka sngi u nongsaid aiñ ba paw ka jylla, Bah V.G.K. Kynta ba dei u Senior Advocate ka Meghalaya High Court kum u Kongsan bad kumjuh u Bah RV Dkhar, Adviser jong ka Synjuk ki Nongsynshar Shnong kum u Symbud Kongsan nalor ki nongïalam jong ka Club, u Rangbah Shnong ka Umpling, Bah S Pyngrope, Rangbah Shnong Madanrting Bah Hollando Kharkongor, Rangbah Shnong Lumbatngen u Bah M. S. Bareh, Rangbah Shnong Nongkhyriem u Bah B. Khyriem uba long ruh u President ka Sports Club ryngkat kiwei ki Nongkitkam bad kiwei kiwei ki nongshah khot sngewbha.
Lah ban kdew hangne ba ïa kane ka lympung ïalehkai la pynlong kum shi bynta ban pynphuh ïa ka jingrakhe jingdap 75 snem ka club kaba la bteng biang ban pynlong ïa ki lympung ïalehkai hadien ka jingsangeh noh kaba 2 snem da ka daw ka khlam Covid-19. Na ka liang ki bor pynïaid ki la pynbna ruh ba ïa katei ka jingrakhe yn pynhap pyrda noh ha u bnai Nohprah mynta u snem.