Yn pynshitom ïa kiba pynphriang khubor hamsaïa, ym don ki kynhun khlong khyllai ha Ri-Bhoi ong u SP

Nongpoh, Naiwieng 03: Hadien ka jingpur sted jong ki khubor hamsaia bala pynsaphriang haki Social Media halor ka jingdon ki kynhun gang kiba shang haka por mynmiet kiba thmu ban khlong ïa u dohnud bad khyllai jong ki briew khamtam ki khyllung khynnah, u Superin tendent of Police ka Ri-Bhoi u Giri Prasad u la pynshai ba katei kam dei satia ka khubor kaba shisha bad ka dei tang ka khubor hamsaia bala shu pynphriang da ki katto katne ngut ki paidbah kaba la wanrah ruh ka jingshong syier ïaki paidbah ha ki shnong ki thaw ha kylleng ka dong Ri-Bhoi.
Kum ban shu pynpaw ba halor katei ka jingpur sted katei ka khubor kaba la pynshong syier ïaki paidbah, kila don ruh ki shnong kiba la pyrshang ban ap miet ban lap ïa kitei ki briew khamtam haki shnong ha Ri-Bhoi, namar kat kum ka jingpynphriang khubor la kam ruh ba kila don ki shnong kiba la beh ïa kum kitei ki briew bym ithuh kiba la rung sha ki shnong, kaba la nang pynartatien shuh shuh ïaki paidbah hadien bala saphriang ki dur bad ki video bala pynpaw ba ki dei haka thaiñ Ri-Bhoi.
Naka liang u SP ka Ri-Bhoi u Giri Prasad u la ong ba kum kitei ki jait khubor ki paidbah kim dei ban shu ngeit biej khlem ka jingpynthikna namar naka liang ki pulit kila pynlong ka jingtohkit halor katei ka khubor hamsaia, hynrei kam don satia kum katei ka jingkynnoh kumba la pynphriang khubor, bad ka dei tang ka khubor hamsaia.
Kumta naka liang u SP u la maham ïaki briew kiba donkti ha katei ka kam ban pyntieng bad pynpar ñiangkhriat ïaki paidbah khamtam ki kynthei khynnah, kaba la ktah ruh ïaka jingmut jingpyrkhat jong ki paidbah, ban pynshitom lada lap ïaki bad kyrpad ruh sha ki paidbah ba kim dei ban ngeit biej, hynrei ban da pynthikna shuwa khnang ba kan nym don kano kano ka jingpyrkhat bakla naki paidbah, u la bynrap.