Shillong, Naiwieng, 01: U Superintendent of Police (SP) ka East Khasi Hills District u Bah S. Nongtnger ha ka sngi Baar ki la pynshai ba ym shym don mano mano ruh ba ïap na ka jingshah shoh ha ka jingïaid rally ba la pynlong da ka Federaration of Khasi Jaiñtia and Garo Peoples (FKJGP) ha ka 28 tarik u bnai baladep.
“Ka la don ka khubor hamasaïa ba la pynsaphriang ha ka Social Media ba uwei u briew uba la shah shoh ha ka jingïaid rally ba la pynlong da ka FKJGP ha ka 28 tarik, Risaw, 2022, u la khladnoh na ka jingmynsaw. Kum ban pyntip hangne ba kane kam dei ka jingshisha. Ki lai ngut ki briew kiba shu mynsaw malu mala ki la ïoh jingsumar bad la pyllait noh ban leit phai sha la ing bad ki dang im,” ong u SP.
U SP u la maham tyngeh ïa ki briew kiba pyn saphriang ïa ka khubor hamsaïa bad kyrpang ruh ïa ki paidbah ba kin ym ngeit ïa kum kine ki khubor lamler.
