Haba thungkam dei ban ïaid katkum ka lynti ym ban shu leh lyndet: President NPYF

Mawkyrwat, Risaw, 26: U State President jong ka National People’s Youth Front (NPYF), u bah Kitborlang Nongrem mynta ka sngi ha ka jingkren jong u ha ophis treikam jong ka Party ha Mawkyrwat lyngba ka Press Conference ula pynpaw ba ha kaba ïa dei bad ka jingthungkam thungjam la ha kano kano department dei ban ïaid katkum ka lynti ym ban shu leh lyndet.
Haba bynrap shuh shuh ïa ka jingkren ha ki lad pathai khubor, bah Kitborlang Nongrem u la ong ba kane ka jingïakren ka long hadien ka jingmih ha ki lad pathai khubor ne ki social media halor ka jingjia ba kynnoh ba ka la don ka jingthungkam sop sop hapoh jong ka jaka sumar ka 100 jingthiah ha Mawkyrwat CHC, South West Khasi Hills ha kaba ka la long ka jingïatai-nia kaba jur bha bad ka daw ka long ba ka la don ka jingthungkam ba la shu thung khlem da don kano kano ka jingpyntip paidbah ne advertise bad khlem da don ka jingleh ïa ki eksam, “hynrei la shu ïohi beit ïa ki kyrteng jong ki nongïoh ïa kata ka kam ne ka appointment”, ong u bah Kit. Namarkata, u la ong ba kane ka la pynlong ïa kiba bun ki samla ba kin don hapdeng ka jingsah-um-dum bad mih ruh ki jingkylli na kiba bun namar ka jingthungkam khlem da ïaid da ka lynti kaba dei.
U la ong ruh ba kum u President ka NPYF jong ka Jylla ryngkat u President jong ka NPYF, South West Khasi Hills District ki buh ka jingkylli bad jingsngewlyngngoh ba ha kano ka dur ka Director of Health Service (DHS) ka thung ïa ki nongtrei lyngba ki post hapoh ka jaka sumar 100 jingthiah ha Mawkyrwat CHC kaba la ïoh jingmang ha ka dur jong ka thungkam shipor (contractual) ïa ki 101 ki kam (post), namar halor kane ka pynlyngngoh ba mynta kane ka jingthungkam ka la nang ïaid shaid shaid khlem ki jingpynbna paidbah ba shai.
Ha kajuh ka por u la ong ba lada lait kam la ha kano kano ka department dei ban don lane dei ban ïaid da ka lynti ha kaba kawei na ki ka long ba dei ban don ka jingpynbna paidbah, kaba ar dei ban don da ki jingthoh eksam bad kiwei de ki lad, bad dei ban thung beit da ki briew kiba la bit ban trei ha kano kano ka jait kam khamtam eh ha ka jaka sumar ba 100 jingthiah ha Mawkyrwat CHC.
Kawei pat ka bynta, u la pynpaw ba lada ki Department ne ki Directorate kin leh da kane ka rukom ban shu thungkam lyndet ïa ki briew ne ki nongwad kam kan long pynban ka jingpynduh mynsiem na ka bynta kiba bun ki samla wad kam la ka long ki samla jong ka distrik ne wat jong ka Jylla baroh kawei. Kumta u la kynthoh ba kane ka jingleh jong ka Director of Health Service (DHS) ka la long kaba bym ïahap katkum ka jingkwah jong ki samla wad kam wad jam namar ka jingwad jong ki samla ha kine ki sngi ka long kaba hiran bad ka shyrkhei haduh katta katta.
Ha kaba ïa dei bad ka jingthungkam thungjam, u State President jong ka National People’s Youth Front (NPYF), u bah Kitborlang Nongrem u la pynpaw ba hooid ki don ha kata ka bynta jong kata ka sorkar hynrei kam mut pat ba lada kano kano ka jingleh jong ka sorkar ba kum ki nongïalam jong ki samla ka NPYF kim lah shuh ban kren kita baroh ki dei tang ki jingpyrkhat jong ki briew. “Lada dei na ka DHS ne na kano kano ka liang kiba don ka bynta halor kane ka jingthungkam lyndet, kum ki nongïalam jong ki samla na ka NPYF kam don kano kano ka jingïada ïa kiba kum kita ki briew namar kim ïaid katkum ka lynti”, ong u bah Kitborlang.
Ha kane ka sngi la ïadonlang ruh naduh u samla Johnfilter Lyngdoh Marshilong, President jong ka NPYF, South West Khasi Hills District ha ryngkat kiwei de ki nongkitkam jong ka NPYF.