Hadien 36 snem la plie ïa ka Vivanta Meghalaya, ka 5 Star Hotel ba nyngkong eh ha jylla

Shillong, Risaw, 14: Kan long ka sngi ka ban sah khana pateng la pateng, ïa ka Vitanta Meghalaya, ka five-star hotel ba nyngkong eh ha ka jylla la plie paidbah ha ka sngi Thohdieng hadien 36 snem da u Myntri Rangbah ka Jylla u Conrad Kongkal Sangma ha kaba la sakhi lang da u Myntri ka tnat Tourism u Bah Sniawbhalang Dhar, u Chairman jong ka MTDC u Saleng Sangma, u Chief Secretary u Bah D. P Wahlang bad kiwei kiwei.
U Myntri Rangbah ka jylla haba kren ha ka jingplie ïa kane ka Hotel u la ïathuh ba ka jingshna ïa kane ka Hotel ka la sdang naduh u snem 1986 bad la lah ban pyndep hadien lai phew snem. U la ai khublei ïa ki kynhun bapher bapher kiba la don bynta ban shna pyndep ïa kane ka projek wat hapdeng ka jingpynthud jong ka khlam Covid.
“Ka Vivanta Meghalaya ka dei kawei ka nuksa bym shym la iehnoh bad kaba bteng ban ïaid shakhmat wat hapdeng ka jingshah tynjuh ba la ïakynduh bad kane ka Hotel kan long ka khana jong ka jylla watla ka slem hynrei ka long kaba jop, kaba don ïa ka thok bad kaba aiti lut,” u la ong.
U la bynrap ba ka jylla ka la mad ïa ka jingbym don jong ki Hotel ïa ki kamra kiba remdor bad ka jingdon jong ka five star hotel ha Shillong kan ailad ïa ka Sorkar ba kan khring ïa ki nongjngohkai pyrthei kiba kham riewspah, ban pynlong ïa ki tamasa ïatem ïaput, ki kam ïalehkai sports bad kiwei kiwei ki jingïalang.
“Ka Vivanta Meghalaya, Shillong kan plie ïa ka juk jong ka jngohkai pyrthei ba kham rem dor ha ka jylla bad kan nang ïaid lynti shakhmat ban pynurlong ïa ka jingangnud jong ki nongshong shnong ka jylla,” u la bynrap.
Haba ïathuh ba u don ka jingangnud ban pynkylla dur ïa ka Meghalaya kum kawei na ki 10 tylli ki Jylla ba pawkhmat ha ki shiphew snem ban sa wan, u Conrad u la ong, “ka Sorkar Jylla ka la trei shitom ban kyntiew ïa ki kam jngohkai pyrthei ha ka shnong Sohra, Jowai, Shillong, Umïam bad Tura bad ha kiwei kiwei de ki jaka ba ki nongjngohkai pyrthei ki kham sngewtynnat.
“Ka Jngohkai pyrthei ka dei ka shnat kaba kongsan bha bad kaba lah ban wanrah ïa ka jingkylla dur namarkar ka Sorkar ka la trei shitom ban theh pisa na ka bynta ban tei pynbha ïa ki jaka jngohkai pyrthei ha ka Jylla. Kane ka kynthup ïa ka jingshna pynbha ïa ki jaka jngohkai pyrthei ba heh ha Sakaladuma, West Garo Hills, ha ka shnong Shnongpdeng ha West Jaiñtia Hills, ha ka shnong Sohra, East Khasi Hills, ha ka shnong Mawlyndep, ha ka shnong Nongmahir ha Ribhoi, ha Nongkhnum ha West Khasi Hills, ha Thadlaseiñ ha West Jaiñtia Hills bad ha Pelgawari kaba don ha South West Garo Hills. Ka jingpynlut na ka bynta ban tei ïa ki Resort bad ki jaka jngohkai pyrthei kan kot kumba T.5 haduh T. 10 klur kawei ïa kaba yn sa tei ha ki shnong bapher bapher,” la ong u Conrad.
U la ïathuh ba yn kyntiew shuh shuh ïa ki jaka jngohkai pyrthei ha ki san snem ban sa wan ka Sorkar ka ladep pynbna paidbah ïa ka ‘Homestay Scheme’ ha kaba 2,500 tylli ki Accommodation Units yn sa tei ha ki san snem ban sa wan da kaba kynthup lang bad ka PMEGP.
“Ïa ka subsidy kaba 35% yn sa ai kum ka ram haduh T. 10 lak da ka Sorkar Jylla ha kaba ka 35% ka subsidy yn sa bei da ka Sorkar India lyngba ka PMEGP. Ki nongshong shnong kin sa ïoh lum khajna shibnai haduh T. 50,000 da kaba siew kum ka EMI kaba tang T. 5,000 hajar. Ka Sorkar haduh mynta ka la ïoh pdiang palat 480 aplikeshon bad ka la mang pisa T. 7.1 klur ban shna kumba 75 tylli ki Homestay,” la ïathuh u Conrad.
Shuh shuh u la pyntip ba yn sa wanrah ïa ki Electrict Bus bad ki kali Luxury na ka bynta ki nongjngohkai pyrthei nalor kaba shna pynbha ïa ki surok kiba pynïasoh sha ki jaka jngokai pyrthei.
Ha kaba ïadei bad ka Shillong Peak Ropeway, ka ban kot haduh T. 140 klur, la khmihlynti ban pyntreikam noh ha kaba kut une u snem.
U Myntri Rangbah u la kren ruh shaphang ka ‘Meghalaya Grassroots Music Project (MGMP)’ kaba dei shibynta ban pynlong ïa ki tamasa ïaput ïatem ha Shillong, Sohra, Tura bad Jowai. Nalor kaba ailad ban ai kamai jakpoh ïa ki riewdonsap, ka MGMP ka dei ruh ka projek bakongsan ban kyntiew ïa ka tem ka put ha ka jylla bad ha kajuh ka por kan ailad ruh ïa ki nongjngohkai pyrthei ban tip kham bha shaphang ki jingrwai tynrai jong kane ka Jylla.
Ïa kane ka Hotel, la aiti ha kane hi ka sngi sha ka IHCL bad shen yn sa plie na ka bynta ki paidbah kiba kwah ban sah ha kane ka Hotel.
Kum ban shu pyntip hangne, ba la tei ïa kane ka Hotel ha ka jaka kaba heh kumba 8,800 sq.m. Kane ka Hotel ka don 101 tylli ki kamra bad kiwei pat ki jnit ki jnat ki long ka Restaurant, ka dukan die Coffee, ka Bar, ka dukan die tiar bad ka Banquet Hall.
Ïa ka Vivanta Meghalaya la long trai da ka Meghalaya Tourism Development Corporation (MTDC) bad la aiwai sha ka IHCL na ka bynta 33 snem lyngba ka Public-Private Patnership (PPP) Mode.