Lada ka Sorkar MDA ka ïai bteng ka jingleh shiliang khmat, ngin kieng AK- 47 noh: HITO

- Shillong, Risaw 14: U President jong ka Hynñiewtrep Integrated Territorial Organisation (HITO) u Bah Donbok Dkhar, u la ong ba lada ka sorkar MDA ka ïai bteng ban leh shiliang khmat ïa ka jaidbynriew katkum ka aiñ bad ka ïaipyntyrha ïa ka jaidbynriew, ka HITO kam banse ban sam noh da ki AK-47 sha baroh ki dkhot jong ka.
Ïa kane, u Bah Donbok u la ong haba kren ha ka sngi ba ka HITO ka pynlong ïa ka jingleit bret syntiew syntiew kum ka jingjubab pharshi ïa ka jingbret tear gas jong ki Pulit sha ki nonghikai Kontrak ha ka 7 tarik mynta u bnai ha ka por ba ki pynlong jingïakhih ban tur sha Secretariat.
Ha shuwa ban sdang ka jingïaid leit bret syntiew la pynlong ïa ka jingïalang ha jaka ba don u Mot Kiang Nangbah hajan Civil Hospital Shillong, ha kaba u Bah Donbok, u la ong ruh ba kane ka jingleh shiliang ka sorkar MDA ka la long shaba palat, namar kano kano kaba leh da ki Khasi ka bym long suda, katba kiwei pat ki jaidbynriew ki ïoh ban leh ne ïaid laitluid.
“Imat kane ka sorkar ka shu ïohi beit ha shyllangmat jong ngi ba ngi dei ki riew bymman ne ki lehnoh. Hooid, ngi dei ki lehnoh tangba ngim dei pat ki buhteng, namar ngim ju buhteng haba ka ri bad ka jaidbynriew ka don hapdeng ka jingeh bad jingma”, u la ong.
Ha shuwa ban pynlong kane ka jingïaid u Bah Donbok, u la bthah ïa baroh ki dkhot bad ki paidbah ba wan kyrshan lang ba kim dei ban ktah kti bad ïa ki Pulit Kynthei kiba don ha duty. “Ngi ngim dei ki khawpud ba ngin ktah kti ïa ki kynthei, kumba leh ki Pulit ïa ki nonghikai kynthei, namar ngi dei kiba mih na i Mei bad ngin pyni ba ngi dei ki shynrang, ki rangbah kiba burom ïa ki kynthei”, u la ong.
Ha kane ka jingïalang la ïoh jingkren ruh na u Babu Birbor Riangtem.
La wan ai jingkyrshan ruh da ka Seng Hynñiewtrep National Movement (HNYM) nangta u Samla Vikey Nelson Marbañiang, uba la ther tyngeh ïa u Bah Prestone Tynsong hynnin ka sngi ha ka jingïalang bad ki Nongthohkhubor. La wan ai jingkyrshan ruh da ki Nonghikai ba la shah beh kam bad kumjuh ruh ki Samla wad kam kiba haduh mynta ka sorkar kam pat pynmih ïa ka result thungkam jong ki.