Halor ka jingdonkam rel shen yn khot ïakren ka sorkar ïa ki kynhun bapher bapher: Conrad

Shillong, Risaw 14: U Myntri Rangbah ka jylla u Conrad Sangma ha ka sngi Thohdieng u la ong ba na ka liang ka sorkar jylla kat haduh mynta kam pat shong thait satia ban pynsngewthuh ïa ka jingdonkam ban pynpoi lynti rel sha ka jylla khamtam eh ïa ki kynhun kiba pyrshah ïa kane bad ong ruh ba na ka liang jong u un sa lum ïa ka jingïalang jong baroh ki kynhun kiba pyrshah ïa kane ha kine ki khyndiat sngi ban wan.
Haba kren sha ki lad pathai khubor u Conrad u la ïathuh ba kam long kaba suk ïa ka sorkar ban shu shim rai haba ïadei bad ka jingpynpoi rel hapoh ka jylla namar ka jingpyrshah ki paidbah bad ki kynhun bapher bapher.
U la ong ba ka sorkar kam shong khli kti na bynta kane bad shen kan ïakren bad ki kynhun bapher bapher la ki dei ki sengbhalang, ki Rangbah Shnong lane ki trai jaka haba ïadei bad ka jingdonkam ban pynpoi rel hapoh ka jylla.
U la ong “Lyngba ka jingïakren bad pynbeit ïaki jingeh jong ki paidbah ka sorkar kan sa lah ban shim rai halor ka Rel hynrei haduh mynta ka sorkar ka dang bteng ban ïakren bad pynsngewthuh ïa baroh ki kyhun kiba don jingpyrshah ïa ka rel namar dei tang da ka jingïakren kaba lah ban pynpoi sha ka thong” bad bynrap “kam dei ka kam kaba suk namar kane ka kam ruh kaba la sahteng da ki bun bun snem namarkata ngim khmih lynti hi ruh ba tang ha ka shisngi arsngi yn lah ban pynbeit ïa kane.”
Kumban shu kdew ba na ka liang ka sorkar pdeng ka la don ka jingtyrwa ban pynpoi lynti rel sha ka jylla kaba ka na Tetelia sha Byrnihat bad na Byrnihat sha Shillong. Na ka liang ka sorkar ka la mang na bynta ka Tetelia-Byrnihat kaba jngai kumba 22 KM ha ka jinglut ba 496 klur hynrei namar ka jingpyrshah ki kynhuhn snegbhalang bad ki paidbah kane ka ka jingpyntrei ïa ka surok rel la shuh hap pynsahteng noh haduh mynta.