Siew kylliang ka HITO da ki syntiew ba kawang Tear Gas ki Pulit ïa ki Nonghikai

Shillong, Risaw 14: Ka Hynñiewtrep Integrated Territorial Organization (HITO) ha ka Sngi Thohdieng ka la pynlong da ka jingleit buh syntiew ha Secretariat, ha ka jaka sah u Myntri Rangbah ka jylla bad ha ki ophis jong baroh ki seng saiñ pyrthei ba don ha ka sorkar ba kynthup naduh ka NPP, BJP, UDP, HSPDP kum shibynta ban pynjur ïa ka jingdawa na ka sorkar ban weng kam shipor ïa ki pulit kiba donkti ha ka jingsiat bom pynsat khmat ïa ki nonghikai kontrak kiba la tur sha Secretariat ha ka 6 tarik.
Ha ka jingkren u Bah Donbok Dkhar u President u la maham ba ka sorkar kam dei ban pynslem ïa ka jingai saja ïa ki pulit kiba donkti ban pynbthei bom pynsat khmat lym kumta na ka liang ka seng kan pynlong biang ïa ki jingïakhih kiba kyndit kyndit kiba ka sorkar kan ktha khlieh.
U Babu Birbor Riangtem u President jong ka Meghalaya Govern ment Lower Primary School Contractual Teachers’ Association ha ka jingkren jong u u la ai khublei ïa ki kynhun seng bhalang kiba la kyrshan ïa ka jingïakhih jong ki naduh kaba sdang bad u la ïathuh ruh ba ki don ki nonghikai kiba dang don hapdeng ka jingshitom na ka daw ka jingktah ka lyer sat khmat kaba ki pulit ki la pynbtehi ha kato ka sngi.
Ha kane ka jingleit buh syntiw ka HITO la ïohi ba na ka liang ka sorkar ruh ka la pynjur ïa ka jingpahara da ki pulit kynthei ïoh mih kano kano ka jingkulmar na kane ka jingïaid paidbah ka HITO ban leit buh syntiew sha kitei ki jaka. La ïohi ba ha kaba sdang na ka liang ki majistor bad ki pulit ki pyrshang ban ïakren ïa ka HITO ba kan leit tang lai saw ngut ki nongïalam jong ka hynrei hadien ka jingïakren ba katto katne por na ka liang ki ki majistor ki la ai lad ba ki ïaid paidbah hadien ba ki nongïalam ka seng ki la kular ba kin ïaid beit thik bad ban ym pynmih kino kino ki jingkulmar.
Ha ka jingïaid paidbah ki dkhot ka HITO ki la pyrta ïa ki slogan ban pynrem ïa ka sorkar, ïa ki pulit ba siat bom pynsat khmat bad ïa ki myntri khmtam eh ïa u Myntri Rangbah ka jylla bad u Bah Lahkmen Rymbui bad kiwei de ki myntri sorkar.
Ha kane ka sngi na ka liang ki nongïalam jong ka seng Hynñiewtrep National Youth Movement bad jong ka STIEH ruh ki la wan shim bynta lang sha ka jingleit buh syntiew ba la khot da ka HITO.