Hiar u Majistor bad ki Pulit na Ri Bhoi ba shah khang ban tep ïa u Rangbah ha u Lum Jingtep ha Lumrit

Nongpoh, Risaw 14: Kiba haïing hasem jong uwei u rangbah ba la khlad noh ki la hap ban mad jingeh kaba dei hadien bai a utei u rangbah la khang ban tep ha uwei u lum jingtep ha ka Shnong Umrit, kaba dei tang na ka daw ka jingïaknieh jaka hapdeng ka shnong Lumrit bad ka Shnong Lumdiengngan kaba la poi u pud haduh ba u rangbah uba la khlad noh la khang pyrshah ban leit tep ha u Lum jingtep.
Kane ka jingjia ka la jia ha ka Shnong Lumrit ha Ri Bhoi District,ha kaba uwei u rangbah ba la tip kyrteng kum u Sebrin Nongrum u la khlad noh ha ka 13 tarik u Risaw, 2022 bad na ka liang kiba haing hasem ki la kynduh mawsiang namar la khang ïa u ban tep ha u lum jingtep na ka daw ka jingpyrsha uwei u rangbah bad ka shnong Lumdiengngan, kiba kam ba katei ka jaka ka hap hapoh u pud u sam ka Shnong Lumdiengngan ha Ri Bhoi District.
Kane ka jingïakynad ka la mih hapdeng ki paidbah na Lumrit bad ki paidbah na Lumdiengngan ha kaba na ka daw ka jingshah khang ban tep ïa utei u rangbah ha katei ka Lum Jingtep, ki bor synshar District lyngba u Majistor bad ki bor Pulit ki la hap ban hiar mardor sha ka Shnong Umrit na ka bynta ban tuklar halor ka jingkhang ban tep ïa utei u rangbah ha utei u Lum jingtep.
Kumba la ïathuh da u Additional Deputy Commissioner ka Ri Bhoi, u Bah R. Kharbihkhiew, la ong ba halor kane ka jingjia, na ka liang ka bor synshar District ryngkat ki bor pulit ki la hap ban hiar sha katei ka shnong, kaba dei hadien ba la khang pyrshah ban tep ïa utei u rangbah ha u lum jingtep kaba la ïa knieh hapdeng ka Shnong Lumrit bad u Emness Mylliemngap uba la kam ba u tei u lum jingtep ba thmu ban tep ïa utei u rangbah ka dei ka jaka jong u.
U la pyntip ruh ba kine ki kynrum ki kynram ki mih ruh ka dei namar ba don ka jingïapher jingmut naduh ka Raid Tynring, ka shnong Lumrit bad ka Shnong Lumdiengngan bad ha kane ka kynti ba la khlad utei u rangbah la mih u pud haduh ba kim ai jaka ban tep ïa u na ka daw ka jingïaknieh ïa katei ka jaka lum jingtep hapedng ka Lumrit bad u Bah Emness Mylliemngap na ka Shnong Lumdiengngan.
Namarkata, u la ong ruh ba dei lyngba ka jingtuklar ka bor synshar district bad ki bor pulit ha ka jingïalam jong u kum u Additional Deputy Commissioner ha kaba khatduh la shah ban tep ïa u tei u rangbah ha katei ka lum jingtep bad kum u Additional Deputy Commissioner ka Ri Bhoi u la kyntu ruh ba kim dei ban khang ban tep lada don mano mano ba khlad bad na ka bynta katei ka jingïakajia pud ki dei ban leit sha ka ingbishar ban ioh ïa ka jingbishar mano ba dei hok ban long trai ïa katei ka jaka katkum ki kot ki sla ban pynshisha halor ka jinglong trai ïa katei ka jaka, u la bynrap.