Ym pat hun ka JAC halor ki jingkular u Myntri ban pynduh noh ïa ka Gaming Act bad ka Casino
Dawa ba dei ban khot da ka Special Session ban pynduh ia katei ka Act.

Nongpoh, Risaw 14: Ki nongïalam ka Joint Action Committee Against Casino na Ri Bhoi District mynta ka sngi ki la pynpaw paidbah ba kim hun satia tang ïa ka jingkren ne ka jingkular u Myntri sorkar, u James K. Sangma ban pynduh noh ïa ka Meghalaya Regulation of Gaming Act, 2021 bad kumjuh ruh ïa ka Casino ha Ri Bhoi District katba na ka liang ka sorkar kam pat lah ban ai da ka jingthoh ne ban pynmih da ka Notification.
Haba ïa kren bad ki Nongthoh Khubor mynta ka sngi, u Secretary ka JAC, u Bah Ferdynald Kharkamni, u la ong ba ïa mynta hi ka JAC kan nym hun satia ïa ki jingkren u Myntri ka tnad Taxation ka sorkar jylla, u James K. Sangma ba u la pynpaw paidbah sha ki lad pathai khubor ba ka sorkar MDA kan pynduh pyndam noh (Repealed) ïa ka Meghalaya Regulation of Gaming Act, 2021.
“Ka JAC against Casino’ na Ri Bhoi District ka dawa ba ka sorkar MDA kan pynmih da ka jingthoh (Notification) khang ban pyntip paidbah ba ïa kane ka Gaming Act la pynduh pyndam bad kum ka JAC kan nym lah ban pdiang da kaba shu kren tang ha ki lad pathai khubor” ong u Bah Ferdynald Kharkamni.
U la ong ruh katba ka sorkar kam pat pynmih da ka Notification halor ka jingshim rai ban pynduh noh ïa ka gaming act, ka JAC ha Ri Bhoi kan nym sangeh ban ïakhih bad kan bteng ruh ban pynlong ïa ka signature campaign ha kylleng ki jaka ka Ri Bhoi bad kan sa pynlong ruh da ka jingïaid paidbah na Nongpoh sha Shillong ban dawa haduh ba la pynthikna ba ïa ka Gaming Act la pynduh pyndam lyngba ka jingthoh bad ruh ban khang khyrdep syndon ïa ka jingthmu ban wan rah ïa ka Casino ha Ri Bhoi District, u la bynrap.
Shuh shuh, u la pynpaw ruh ba ka JAC kam hun hi tdot tang ha ki jingkren ha ki lad pathai khubor bad na ka liang ka JAC kumba la kular ban pynduh pyndam noh ïa katei ka Gaming Act da u Myntri ka Taxation la dei ban khot da ka special session ban pynduh pyndam ïa katei ka Act bad lada ym pat lah ban leh kumta na ka liang ka JAC kam hun tang ban shu kren da ka ktien khlem da ka jingthoh lane ka Special Session ban pynduh pyndam ïa katei ka Meghalaya Regulation of Gaming Act, u la bynrap.