Shillong, Risaw 10 : Ki nongtrei kontrak jong ka MeECL hapoh ka lama MeECL Progressive Workers Union (MPWU) kila sdang biang mynta ka sngi ïa ka jingïakhih kaba shi kynta ka ban bteng haduh ka Sngi Thohdieng ban pynpaw ïa ka jingdawa ba ka MeECL ka dei ban ithuh noh ïa ki nongtrei ba la trei slem kum ki nongtrei ba pura. Ha ka 17 tarik pat ki la rai ban tur bad ïaid paidbah sha Secretariat na Lumjingshai ka ophis treikam jongka MeECL.
Ka kong Anjelina Hynniewta General Secretary ka seng ka la ïathuh ba ha kine ki sngi ki la sangeh ïa ka jingïakhih jong ki namar ba ka don noh ka jingleh niam puja bad mynta kane ka jingleh naim kala kut bad ki sdang biang ïa kane ka jingïakhih shikynta ha ka por bam ja ha khmat ophis jong ka Power House kaba don ha pyrshah ka secretariat.
La ïathuh ba ha ka 17 tarik mynta u bnai, kata ha ka sngi nyngkong ban wan baroh ki nongtrei kontrak ka MeECL na kane ka jylla Meghalaya kin shim shuti lut haka tei ka sngi ba kin ïoh ban ïa shim bynta ha ka jingïaid paidbah na Lumjignshai ka ophis treikam kaba ha khlieh duh sha ophis jong ka Power House sha Secretariat.
La ong ba lada ka sorkar kam sngap ïa kane ka jingdawa hadien ka jingïaid paidbah kin sa shim da kiwei ki lat jingïakhih ïa kaba kim pat lah ban ïathuh lypa mynta. Ka jingïaid paidbah ban long ha ka 17/10/2022 kan long da baroh ki nongtrei kontrak ka MeECL kiba don ha kane ka jylla Meghalya.
U bah Arju Dkhar u wei na ki nongkit kam ha ka seng ki ophisar ka MeECL u la ong ba kane ka jingïakren ban ithuh noh ïa ki nongtrei kontrak kum ki nongtrei ba pura ka long naduh u snem 2018 bad ha katei ka jingïakren la thoh ha ka jingïakren ba kito kiba la trei 15 snem yn ithuh noh ïa ki kum ki nongtrei ba pura ka MeECL.
U Bah Dkhar la ong ba ki nongtrei kontrak ki don 1700 ngut tam bad kane ka jingïakhuh kan kynthup ruh ïa ki Home Guard, kane ka jingïakren ruh kala shu jah, halor ka jingong ba dang hap ban peit ïa ki kydon aiñ, kane ka dei ka jingai daw, lada ka don ka mon ka sorkar ka leh ban leh.
Haba ïa dei bad ka jnglut jignsep la ong ba kan nym ktah palat namar ka jingithuh kum ki nongtrei ba pura kam dei ha ka juh ka por hynrei ka dei tang ïa kito kiba la kynjoh sha ka 15 snem. La ong ba ka jingduhnong jong ka MeECL ka dei namar ba ïa ka bor ding kaba ki thied ha ka jaka ban phah sha ki jaka ban ïoh nong la phah sha ki jaka ban duhnong.
