Ki paidbah ki ap satang ïa ka elekshon ban pynrem noh ïa ki Party ba don ha ka MDA

Shillong, Risaw 07: U Bah John Antonios Lyngdoh, ba ju khot u Bah Dip, MLA barim, mynta ka sngi, u la pynïasoh noh bad ka Congress ryngkat ba ki spah ngut ki nongbud jong u.
La pdiang sngewbha ïa u da u Working President ka MPCC, u Bah Pynshngaiñ N. Syiem ryngkat ka jingïadonlang ka Debora Marak, nangta ki nongkitkam ka North Shillong Block Congress Committee, ki Mahila Congress bad ki Youth Congress.
Haba ïakren bad ki nongthoh khubor hadien ba ladep pynïasoh bad kane ka Party kaba u la sdang ïa ka lynti ïaid jong u ha ka saiñpyrthei, u Bah Dip, u la ong ba hadien ba u la mih noh na ka BJP, u la ïohi ba dei tang ka Congress kaba la ïeng rangbah ban kren tyngeh ïa ki kam bamsap jong ka sorkar MDA. U la ong ba kane ka sorkar MDA ka la synshar da ka bamsap bampong kaba shyrkhei bha naduh ka kam khaïi dewïong beaiñ, ka jingtei ïa ka ISBT kaba mar ïadep pyntreikam mar ïapei um noh. Nangta ka jingkieng ka Umroi kaba mar ïadep moramot mar ïakhyllem noh. “Ki don shibun kiwei pat ki kam bamsap kiba ki paidbah ki la ïatip bad ïohi lut bad u paidbah u la kdang u la ngiah ïa kane ka sorkar”, la ong u MLA barim ka Mawphlang.
Shuh shuh u la ong mynta kane ka sorkar ka la wanrah sa ïa ki kam khalai lyngba ki Casino ïa kaba la pyrshah da ki paidbah, ki Sengbhalang, ki nongïalam niam bad kiwei kiwei pat ki kynhun. Hynrei katta ruh ka sorkar ka dang thok im im peit peit ba ka la pynsangeh katba ïa ki laisen pat ka ladep ai. “Kane kadei ka sorkar ka bymn kheiñ snep satia ïa u paidbah, ka sorkar kaba pyrshah ïa ka mon u paidbah”, u la ong da kaba bynrap ruh ba kane ka sorkar lane baroh ki Party kiba don lang ha kane ka sorkar kidei ban shah kynjat noh. “Kane ka sorkar kam don hok shuh ban dang ïoh synshar ha ki snem ban wan namar ki kam jong ka”, u la ong.
Halor ka jingmih ïakhun elekshon ki heh sorkar ba la shongthait na North Shillong, u Bah John u la ong ba ki paidbah ki ïohi bad ki tip balei ba ka jingtei ïa ka Dome ha ka ïingdorbar thawaiñ ba thymmai ka khyllem bad mano ba dei peit ïa ka jingtei ïa ka. Nangta ha liang ka koit ka khiah, ha kaba la shu bret ïa ki dawai kiba la kut ka por ban dih kaba la long ka jinglehnoh ei ïa ka pisa jong u paidbah. “Ki paidbah ki la ïohi lut ïa kine bad ki ladep rai lypa, namar ki la bitar palat ïa ka jingleh jong kane ka sorkar”, u la ong.
U la ïathuh ruh ba ki nongkyrshan kiba la don bar u baroh shi katta ha ka BJP, mynta ki la wan bud lang bad u sha ka Seng Congress bad kine kidei na kylleng kylleng ki jaka jong ka Constituency.
U Bah John Antonio Lyngdoh, u la ïathuh ba u la rung nyngkong eh ha ka Seng Congress kum u dkhot jong ka Youth Congress ha ka por ba u (L) Bah EK Mawlong u long u President ka MPYC. Hadien haba u Bah EK Mawlong u la rung sha ka HSPDP bad hadien pat kum u nongïalam ka UDP, ma u ruh u la leit bud lang sha ka UDP ban jop ïa ka elekshon na Nongspung Constituency ha u snem 1998, 2003 bad 2008. U la bat ruh kum u Myntri ha ka sorkar jylla. U la long ruh u MDC jong ka KHADC ha shuwa ba un jop kum u MLA.