Duwai ki nongïalam niam ban pynkylla bamut U Blei ïa ki Nongmihkhmat kum ïa u Khun Sarong Awria

Shillong, Risaw 07: Ka Khasi Jaiñtia Church Leaders Forum (KJCLF) ne ka kynhun ki nongïalang Balang ha Khasi Jaiñtia mynta ka sngi ka la pynlong ka jingduwai kaba kyrpang halor ka jingbym treh ka sorkar ban weng ne pynduh pyndam noh ïa ka aiñ ïakhalai ne ka Meghalaya Regulation of Gaming Act 2021.
Ïa kane ka jingïaseng duwai la pynlong ha ïingmane English Service jong ka KJP Assembly ha Khyndailad.
U Most Revd. Dr. P. Lyngdoh, President jong ka KJCLF, ha ka jingkren jong u, u la ong ba ka jylla bad ka pyrthei hi baroh kawei mynta ka don hapdeng ka jingeh kaba khraw namar ka jinghiar thma ki jingsniew kiba bun jait ha kine ki sngi.
Kawei na kine ki jingsniew kiban sa wan hadien kadei ka jingwanrah ka sorkar ïa ki kam ïakhalai da kaba wanrah ïa ka aiñ. “Ngi la kyntu ïa ka sorkar ban weng noh syndon ïa kane ka aiñ, ym dei ban pynsangeh ïa ka casino, hynrei ka sorkar kam shym la treh ban weng ïa ka aiñ”, la ong u Revd. Lyngdoh, da kaba bynrap ba kane ka mut la pynkylla ïa ka Meghalaya kata ka jylla ki kam ïa khalai ha ri India ba la ithuh da ka aiñ. “Kane kadei ka jingtynjuh kaba don hakhmat jong ngi”, u la ong haba ai jingkren kum u nongïalam ïa kane ka jingïaseng.
U la ong ba kum ki Khristan kim kyrshan satia ïa ki kam ïakhalai namar ka long pyrshah ïa ka mon U Blei.
Nalorkata, u Revd. Lyngdoh, u la ong ba ka jylla mynta ka la jyllei palat ki kam bamsap ha kaba ka la long ka jinglehraiñ kaba khraw bad kadei ïa baroh ban phai sha U Blei ha ki jingduwai. “Ngin duwai na ka bynta ki nongsynshar, ki nongmihkhmat jong ngi ba U Blei Un pynkylla kumba pynkylla ïa ki khun sawrong awria ba kin kylla kaba mut noh bad phai noh sha ka lynti kaba bha”, la ong u nongïalam ka KJCLF.
Kane ka jingïaseng duwai ka la pynpaw ruh ka jingsngewkhia halor ka jingshah siat tear gas jong ki nonghikai kontrak hynnin ka sngi ha kaba ka la ktah ïa ki nonghikai kynthei bad ïa ki khynnah kiba dang rit ruh. “Kane kadei kaei kaei kaba kum ka jylla ym lah ban pdiang”, la ong u Revd. Lyngdoh.
Ha kane ka jingïaseng la ïoh ruh ïa ka jingpule na ka ktien U Blei bad ka jingduwai na i Kong Balasuk Warjri, i dkhot jong ka Balang Presbyterian Malki, iba la duwai kyrpang na ka bynta ka jylla, na ka bynta ki nongsynshar na ka bynta ki nongmihkhmat paidbah ba kin shem ka jingkynduh ïa baroh ki kam kiba bakla ba ki la leh bad ba U Blei Un thaw thymmai ïa kane ka jylla.
La ïoh ruh ïa ka jingkren na u Fr. Richard Majaw, ka jingduwai na u Rev. Dr. Leaderwell Pohsngap, bad na na u Bah RO Wahlang.