Weng ki nonghikai kontrak ïa ka jingïakhih ba kular ka Sorkar ban ailad ïaleh eksamin

0

Shillong, Risaw, 07: Ki nonghikai skul kontrak kiba don hapoh ka shatri jong ka Meghalaya Government Lower Primary School Contractual Teacher’s Association (MGLPSCTA) ha ka sngi Thohdieng ki la pynkut noh ïa ka jingïakhih kaba la neh shi bnai kynthih hadien ba ka Sorkar Jylla ka la kular ban pynjlan ïa ka rta ban ïakhun ïa ka eksamin Meghalaya Teachers Eligibility Test (MTET).
U Myntri ka tnat Pule Puthi ka Sorkar Jylla u Bah Lahkmen Rymbui uba la khot ïakren ïa ki nongïalam jong ka MGLPSCTA u la kular ba ka Sorkar kan pynjlan ïa ka rta ban ïakhun ïa eksamin MTET ka ban sa long shen na ka bynta ki 800 ngut ki nonghikai skul kontrak.
“Kine ki nonghikai ki dei kiba la palat ïa ka rta kaba 37 snem,” ong u Bah Lahkmen Rymbui ha ka jingïakren bad ki lad pathai khubor hadien ka jingïakynduh ïa ki nongïalam jong ka MGLPSCTA.
Haba pyntip ba kane ka jingdawa jong ki nonghikai skul kontrak kam dei shuh kaba dang thymmai u Bah Rymbui u la ong, “kane kam dei shuh ka mat kaba thymmai. Ki nonghikai kontrak ki la ïakynduh ïa nga la bun sien naduh u snem 2018. Ha kato ka por, nga ladep kren da kaba shai ba ka eksamin Teachers Eligibility Test ka dei kaba donkam tam namarba katkum ka Section 23 jong ka Right to Education Act ka la kdew shai ba ka jingthungkam ïa ki nonghikai ha ki Elementary Education ki dei ban long katkum ki kyndon ba la pruiddak da ka NCTE.”
“Hynrei ha ki snem 2012-2014 bun na ki nonghikai kiba la don lypa ha ka kam kim shym la kot ïa ka 45% na ka bynta ki Schedule Tribe bad kumta ka Sorkar ka la ailad biang na ka por sha ka por ban ïakhun ïa ka eksamin Class-XII ba la pynlong da ka Meghalaya Board of School Education (MBoSE) khnang ba kin dup lah ban ïoh 45% ka Marks bad ïa kane ngi ladep leh jin haduh ar lai sien ne haduh san sien,” ong u Bah Rymbui.
“Namarba ka D.El.Ed ruh ka dei kwei na ki kyndon ban thungkam ïa ki nonghikai ka Sorkar Meghalaya ka la ïateh bad ka National Institute of Open Schooling (NIOS) khnang ba ki nonghikai kiba la don ha ka kam kin dup lah ban pyndep ïa ka D.El.Ed lyngba ka NIOS. Ïa kane ruh la pynjlan na ka por sha ka por ha kaba ki don kiba la pyndep ïa ka D.El.Ed hynrei kim shym la ïoh ïa ka 45%,” la pynshai u Bah Rymbui.
U la ong ba ha u snem 2018 u la pynshai ba ka Sorkar kan pynjlan ïa ka rta ïaleh eksamin bad ka tnat Pule Puthi ka dei ka tnat banyngkong eh ban pynjlan ïa ka rta na ka 32 snem sha ka 37 snem na ka bynta ka jingmyntoi jong ki nonghikai skul kontrak.
“Hadien kane, ka Sorkar ka la pynlong ïa ka eksamin TET bad ban sdang ïa ka jingthungkam ha baroh ki District hynrei lait noh tang ha Dadenggre Sub-division,” la ïathuh u Bah Rymbui.
U la ong ba ka jingslem ban thung ïa ki nonghikai ha Dadenggre ka dei tang na ka daw ka jinglait tuh ka jingkylli ha ka por ba la pynlong ïa ka eksamin TET ha ka jylla. “Ngi lap ba ka jinglait tuh jong ki jingkylli ka long tang ha Dadenggre Sub-division katba ha baroh ki Sub-division ba la pynlong ka eksamin ka ïaid beit bad la pynbna ruh ïa ka resol,” u la ong.
Shuh shuh u la ïathuh hadien ba la thmu ban pynlong biang ïa ka eksamin TET ha Dadenggre Sub-division bad ban pynmih ïa ka Advertisement ka la wan noh ka Elekshon MDC ha kaba la pyntreikam ïa ka Model Code of Conduct.

Leave A Reply

Your email address will not be published.