Kyntu u MLA ka Mawlai ïa ka Sorkar ban isynei lem ïa ki Nonghikai skul Kontrak

Shillong, Risaw 5 : U MLA jongka Mawlai Constituency u bah Process T Sawkmie u la kyntu jur ïa ka sorkar ba kan sngewsynei lem ïa ki Nonghikai Kontrak kiba la ïai bteng ïa ka jingïakhih thiah miet hakhmat u mot Kiang Nangbah hajan Civil Hospital, Shillong mynta lah 28 sngi lynter.
Haba ïakren bad u nongthoh khubor u bah P.T Sawkmie u la ong “ Kam don jingeh ne jingpher ei ei ïa ka sorkar ban khot biang ïaki sha ka miej jingïakren bad thaw ki lad ki lynti kumno ban ïarap ïa ki lada ka long da kano kano ka lad ka lynti ruh tang ba kin ïoh thaw lad ïa lade ba kin lah ban bsa bad pyndap ïa ka ïing ka sem jongki. Hooid ngi sngewthuh haduh katno ka buh ïaki long ïing ha ka jingeh kiba la im baroh shi katta da ka tulop kum ki nonghikai, khamtam lada u kpa bad ka kmie ruh ki dei ki nonghikai, hynrei ka sorkar ka dei ban shim khia bad pyrkhat lem ïa ki. Sngewbha sieh don ka mynsiem sngewsynei lem ïa kiba pli kiba la ïai bteng ïa kane ka jingiakhih”.
Kine ki nonghikai kim da bun eh ruh kumta ka sorkar ka dang lah hi ban leh ei ei na ka bynta jongki lada ka long da kano kano ka lad ka lynti ruh, ong u bah Sawkmie.
U la ong lada ka sorkar Assam ka kloi ban ïarap ïaki nonghikai kontrak bad SSA balei ka sorkar Meghalaya kam lah, ka lah eh lada ka don ka mon. Ha ka jaka ban pynlut ha ki kam tamasa ka lah ban pynlut na ka bynta jong kine ki nonghikai ruh. Hooid donkam hi ki tamasa ruh ban khring ïaki nongwan jngoh kai sha ka jylla tangba ym da dei tang ban pynlut haduh katta tta haba kine ki jingeh ki don mynta ha khmat.
Kumta u la ong “ Sa shisien nga kyntu jur ïa ka sorkar ban sngewsynei lem na ka bynta jongki bad khot ïakren biang ïa ki bad thaw ki lad ki lynti kumno ban ïarap ïa ki la ka long da kano kano ka kam ruh”.