Nongstoiñ, Risaw, 4: Ka jingïaseng Samla jong ka Umyiap District kan sa rakhe ïa ka Jubilli rupa ha ka taïew ba ar jong u bnai Naiwieng ban wan. Kumta kum ka jingpynkhreh ïa kia jingrakhe ïa katei ka Jubilli rupa, mynta ka sngi ka la sdang da ka jingïalehkai sport ha madan riewblei kaba don ha pdeng jong ka pyntha Umyiap.
Ïa katei ka jingïalehkai la plie da u bah Pulstar Nongsiej u ba la shah khot kum u kongsan, ha ryngkat ka jingïadon lang jong ki nongkitkam jong ka jingïaseng Samla District, u Pastor D.R.Marngar bad u Pastror S.K.Kharsyntiew, kiba dei ki Pastor Incharge jong ka District.
U bah P.Nongsiej haba kren kum u kongsan, u la ong ba ka jingpynlong jong ka Jingïaseng Samla Umyiap District ïa katei ka jingïalehkai sport, ka long kaba don kam haduh katta katta namar ki samla kiba pynleit jingmut ha ki jingïalehkai sport ki kham lait na ki kam sniew.
Nalor kata u la ong ruh ba ka jingïalehkai sport ka pynkhuid ïa ka jabieng bad ka pynkhlaiñ ïa ka met ka phad bad ki samla kiba don ïa ka jabieng kaba khuid bad ka met kaba koit ba khiah ki khlaiñ ruh ha ka kam shakri Blei. U la kyntu ruh ïa ki samla bad ki nongïalam jong ka Jingïaseng Samla District, ba kin pynmlien barabor ban minot ha ki jingïalehkai sport, khnang ba ki jingmut jingpykhat jong ki kin long kiba khuid .
Ha katei ka jingïalehkai sport ki samla shynrang bad kynthei na ki khyndai tylli ki Balang, ba kynthup ïa ka Jingïaseng Samla Balang Presbyterian Umyiap, Lumpyngngad, Sohpian, Nongspung, Ksehkohlong, Mawïawet, Mawlyngkhar, Lawrapha bad Mawsngapwir ki la wan ban ïashimbynta shitrhem naduh ka sngi ba sdang. Nalor kata ïa ka wat ka ba ar yn pynlong ha ka hynriew tarik, kaba dei ka sngi palei ha katei ka juh ka madan bad ha katei ka sngi palei ka jingïalehkai kan sdang naduh ka por 8.30 baje mynstep.
Na ka liang ki nongpynïaid ïa katei ka jingïalehkai sport, ki la kyntu ïa baroh kiba wan ban ïashim bynta ba kin poi ha madan ha ka por ba biang, khnang ba yn lah ban pyndep ïa baroh ki jingialehkai ha ka por kaba biang. Kawei pat ka bynta kaba ka Jingïaseng Samla Umyiap District ka la pynkhreh shuwa ban rakhe ïa ka Jubilli rupa, ka dei ka Mini Gospel Concert kaba yn pynlong ha ka Balang Presbyterian Sohpian. Ka kynhun ka ban ai jingrwai bad tem ka dei ka Zamar Voice ka kynhun tem jong ka Jingïaseng Samla Balang Presbyterian Ksehkohlong.
