Kyntu ki nongrep WKH ïa ka Sorkar ban phai khmat sha ka rep sla sha

Nongstoiñ, Risaw 4: Ka jingrep ïa u sla sha ha West Khasi Hills ka la sdang la slem bha, hynrei haduh mynta hi kane ka kam, kam shym la paw na kane ka District. Ka daw ka dei namar ba ki nongrep sla sha, kim shym pat la ioh jingmyntoi ha ka ban kyntiew ïa ka ioh ka kot bad ka kami kajih ka jong ki, watla ki la pyrshang ban trei shitom ha kane ka kam.
Kumban shu pynkynmaw ba ka jingrep ïa u sla sha hapoh ka District, ka la sdang nyngkong eh na Riangdo jong ka Mawshynrut Civil Sub Division bad katei ka jaka rep ka dang neh haduh kine ki sngi, watla ym shym la lah ban nang pynheh shuh shuh ïa katei ka jaka rep. Ha katei ka kper sla sha ki don ruh ki nongtrei bad ki jaka sah jong ki, ïa kaba naduh ki snem ba mynshuwa la pynïaid ïa katei ka jaka rep da ka Agriculture Department bad baroh ki nongtrei ha katei ka kper sla sha ki hap hapoh ka jingpynïaid jong katei ka ophis.
Haba phai ha ka jinglong jingman jong ka jingshit jingkhriat jong ka suiñ bneng bad ka jingsboh jong ka khyndew, u sla sha bad wat u kophi ruh ha katei ka thaiñ, ki dei ki jingthung kiba biang bha ban rep ban kyrshan ïa ki paidbah nongrep.
Lada ka sorkar kan phai khmat bad thaw ki lad ki lynti ban kyntiew ïa ka rep sla sha, ym artatien ba kan long ruh kawei na ki lad ai kam ai jam ïa shibun ki nongshong shnong hapoh ka District. Namar u sla sha u dei u mar rep u ba la ju thung tang shi sien bad u lah ban im da ki phew snem.
Kum ban pynkynmaw ba ha ki snem ba la dep katto katne ki nongshong shnong na ka thaiñ Riangdo, ki la pyrshang ban shna ïa kawei ka karkhana rit ban saiñ ïa u sla sha na ka bynta ba pynïaid ïew bad shalan sha kiwei pat ki jaka. Hynrei, namar ka jingbym pat lah ban pynbiang ïa ki kor ki bor kiba bha bad ka jingbym don ïa ki nongtrei kiba la shah pyntbit ha katei ka kam, katei ka jingpyrshang jong ki ka la shu kut noh.
Ha ki snem kiba kham mynshuwa, ki nongpynïaid ïa katei ka jaka pynmih sla sha, ki la pyrshang ban pynshlur ïa kiba bun ki nongrep kiba don ïa ki jaka rep kiba biang ban rep sla sha. Hynrei na ka daw jong ka jingbym biang jong katei ka jaka saiñ bad tylliat sla sha, katei ka jingpyrhang pynshlur ka la shu kut noh khlem poi haei haei ruh.
Ki la don ruh ki nongrep kiba la pynlut por ban rep sla sha, hynrei hadien katto katne por ki la iehnoh shrah noh ïa ki jaka rep jong ki haduh ba kitei ki jaka rep ki la kylla khlaw da ki dieng sla sha.
U Bah C.Dkhar uwei na ki riew rangbah na ki thaiñ Riangdo, u la ong ba baroh ki paidbah nongshong shnong hapoh ka jylla haduh mynta, ki dang pyndonkam beit da u sla sha u ba mih na Assam, Darjeeling bad na kiwei kiwei ki jaka. Hynrei kim tip pat ba u sla sha u ba rep hapoh West Khasi Hills, u dei u ba bha tam bad u ba bang tam na baroh ki jait sla sha kiba la pynmih na kiwei pat ki jylla.
Kumta kaei kaba donkam eh ka long ba ka sorkar Jylla ka dei ban theh buk buk ka pisa lyngba ka tnad ba dei peit ïa ka rep ka riang, khnang ban kyrshan ïa ki nongrep jong ngi ba kin lah ban pynurlong ïa ka jingangnud bad ka jingthmu jong ki.