Shillong, Risaw 02: Ka don ka jingong, “ka Um ka dei ka jingim”. Ka jingpyntreikam Pura ïa ka skim ban pynbiang umbam umdih kaba Khuid ha baroh ki thliew ïing ka jylla, la ïoh jingithuh da ka sorkar kmie ha ka rynsan sam khusnam jong ka Ri ha ka sngi U Blei jong ka 2 tarik Risaw.
Ha kane ka sngi kyrpang kaba dei ka sngikha jong u kpa ka jaidbynriew, u Mahatma Gandhi, ka President ka Ri, ka Droupadi Murmu ka la pynkup burom ïa ka jylla na ka jingïoh nam Best Performing states ban pyndonkam pura ïa ka JJM (Jal Jeevan Mission) ha ka ri.
U Myntri ka tnat Public Health Engineering (PHE) u Bah Renikton Lyngdoh Tongkhar u la pdiang ïa kane ka khusnam ha ka jingïadon lang u Gajendra Singh Shekhawat, u Myntri ka sorkar pdeng u ba dei peit ïa ka Jal Shakti, jong ka Sorkar India.
Ka jylla Meghalaya ka long ka jylla ka ba rit lada ïa nujor bad kiwei ki jylla ka Ri, hynrei ka la wan ba ar ha ka thup ki jylla kiba lah ban pyndonkam pura ïa ka skim JJM. Ha ka thup ‘Har Ghar Jal’ (HGJ), ka Meghalaya ka wan kham hakhmat ban ïa ka Assam, J&K, Kerela, Manipur, Nagaland, Rajasthan, Sikkim, Tripura, Uttarakhand, Karnataka, Goa, bad kiwei ki jylla.
“Ban pynbiang bad pyndap umbam umdih, ka dei kawei na ki thong kaba kham eh jong ka sorkar. Da ka jingsdang ïa ka JMM ha u bnai Nailar 2019, tang 4,500 ki long ïing ha ki thain nongkyndong ki la ïoh umbam umdih da ki kor um ha la thliew ïing hynrei mynta, kumba 2.53 lak ki thliew ïing ki la ïoh kor um dih ha la ïing. Shuh shuh kumba 100% na ki longïing kiba don ha ki 1500 tylli ki shnong, mynta ki la ïoh um ha la ïing, kaba la ïarap shibun bad pyllait ïa ki na ka ban leit tong um na ki jaka ba jngai. “Nga ai nam ïa kane ka khusnam sha baroh ki ophisar bad ki nongtrei jong ka tnad PHE kiba la trei borbah ban pynurlong ïa kane ka skim kaba jop”, ong u Conrad Sangma, u Myntri Rangbah ka Meghalaya.
Ka jingeh ban pyntreikam ïa kane ka skim ha jylla ka long ka jinglong jingman ki jaka thiep bad ki sharing lum ha jylla, ki jingjngai ki ïing na kawei sha kawei pat khamtam ha ki thain nongkyndong. K jylla ka la pynkiew ruh ïa ka jingbei tyngka na ka 27 klur tyngka ha u snem 2019 sha ka 1407 klur ha u ne u snem 2022, ka jingkiew kaba 51 shah ban pynbiang umbam ha jylla.
Shuh shuh, ka Project Urban Water Supply Phase-I jong ka Williamnagar, la khein kyllum ha ka jinglut kaba 122 klur tyngka. Kiwei ki project sam umbam ki kynthup ïa ka Greater Shillong Water Supply Project, ka Nongstoin Urban Water Supply Project, ka Greater Rymbai Water Supply Project, bad ka Greater Ampati Water Supply project ha ka jinglut ka ba 593 klur tyngka.
“Kane ka khusnam ka dei shisha ka khusnam lyngba ka jingtrei shitom ban pynbit pynbiang umbam ïa baroh. Tangba ngi dang jngai ka lynti ban poi sha ka thong ban kyntiew ïa ka jylla sha ka kyrdan jong ki shiphew tylli ki jylla ha ka ri baroh kawei,” pynkut u myntri ka jylla u Conrad Sangma.
