Kynran dien ka longïing Gandhi ban shimti shuki President ka AICC yn ïakhun u Kharge bad Tharoor

0

Shillong, Risaw 2 : Hadien ba la mih bun ki jingkynthoh ba ka Party Congress ka dei ka party jong ka long ïing ki Nehru-Gandhi wat la kane ka long ïing ka la ïalam ïa ka Congress da ki phew phew snem mynta, hynrei mynta ka kynti ka Sonia Gandhi, u Rahul Gandhi bad ka Priyanka Gandhi Vadra ki la rai ban kynran dien noh ban ïa khun ïa kane ka shuki President jongka All India Congress Committee (AICC) da kaba ki la rai ruh ban ym kyrshan ïa uno uno ruh na ki ban ïakhun hynrei kin pdiang bad mynjur ïa uno uno uba ki nongïalam bad ki dkhot jongka Party ki jied ban shimti ïa kane ka kam.
Kumta ha kane ka kynti ki ban ïakhun ïa kane ka shuki kin long noh u Shashi Tharoor u MP ka Lok Sabha na Thiruvanthapuram, Kerala ba 65 snem ka rta pyrshah ïa u Mallikarjun Kharke MP Rajya Sabha na Karnataka ba 80 snem ka rta. U K.N Triparthi na Jharkhan ruh u thep kyrteng tangba u shah kyntait noh namar bym biang ki jingdonkam kumba la bthah da ka riti pynïaid kam ka seng Congress.
Na ka liang u Tharoor u la dep pynpaw “ Wat la ka long ïing Gandhi kam shimti shuh ïa ka shuki President hynrei kin long hi ki nongsaiñdur bad nongai buit aibor jongka party ha ki por ban sa wan ruh ym dei ba kin leh jngai na ka party”.
Ka jingthep vote na ka bynta kane ka shuki President ka AICC kan long ha ka 17 tarik Risaw 2022 bad ka jingniew vote kan long ha ka 19 tarik Risaw 2022. Kin don 9000 ngut ki dkhot jongka Congress ki ban ïashim bynta ha ka jingthep vote. Nangne na Meghalaya kin don tang 68 ngut ki ban leit ïashim bynta ha katei ka jingthep vote. Kan long ruh ka sien ba nyngkong eh ba ka Congress kan leit ban jied President AICC khlem ki MLA.
Kine ki arngut ki kyrtong ki la sdang ban ïaid kylleng ki jylla ban leit pan jngkyrshan na ki dkhot jongka Congress na ka bynta katei ka shuki President khnang ba kin ïoh pynkylla dur biang ïa ka seng Congress kaba la nang ring swai nang ring swai katba nang ïaid ki por.
Kane ka jinghap pynlong ka Congress ïa ka ilekshon ka dei namar ka jingbym treh shuh u Rahul Gandhi ban shim ïa ka lyngkor President wat hadien ka jingleit khroh leit kjor kiba bun bah ki nongïalam ba la kham rangbah jong ka seng bad ki nongkyrshan radbah jong ka longïing longsem Gandhi.
Kumba long mynta kane kan dei ruh ka ilekshon kaba nyngkong eh hadien 24 snem ha ka seng Congress mynba ka jingïakhun hapdeng ka Sonia Gandhi pyrshah u Jitendra Prasad kaba ka Sonia Gandhi ka pynrem kput ïa u Prasad katba ïa u Rahul Gandhi ha u snem 2017 u jop suk khlem don ka ïakhun ilekshon namar ym don nongïakhun pyrshah ïa u.
Kane ka jingïakhun hapdeng u Tharoor pyrshah u Kharge la dep tip thikna ba kan buh ïa u Tharoor ha ka jingeh bha ban jop namar kiba bun ki la ngeit ba na ka liang ki Gandhi ki rai ban pynïeng ïa u Kharge uba dei ruh u nongkyrshan ba pyndem tdong jong ka ïing ka sem jong ki ym kum u Tharoor uba la phah ruh da ka shithi ryngkat ki 23 ngut ki nongïalam ka Congress ban dawa pynlong ilekshon noh na bynta ki post ha ka party jong ki.
U Tharoor u dei ruh u MP jong ka seng Congress uba la jop laisien bad uba la kular ruh ba lada ki dkhot ka congress kiban ïoh thep Vote kin pynkhamti ha u ïa ka lyngkor na ka liang jong u un pynkylla dur ïa ka Congress namar ka rukom ïakhun ilekshon jong ka pyrshah ïa ka BJP hapoh ka jingïalam u Modi bad u Amit Shah kam ju lah ban jop satia.
U Tharoor u dei ruh u myntri barim jong ka sorkar pdeng bad u nongthoh kot uba bna nam bha uba la pynmih 24 tylli ki kot uba la long teng ruh u Under Secretary General jong ka United Nations.
Katba u Kharge pat u la jop kum u MLA na ka jylla Karnataka la 9 sien bad kum u MP pat 2 sien bad u la long ruh u Nongïalam ka Liang Pyrshah ha Rajya Sabha ha shuwa ba un hiar shuki noh na bynta ban pynkhreh ïa ka ilekshon President ha ka seng Congress.
Lada peit na ka kyrteng kiba tyrwa ïa u kum u kyrtong la ïohi ba u Kharge u ïoh ruh ka jingkyrshan kaba khraw na kiba bun bah ki nongïalam ba la kham rangbah ka seng ym kum u Tharoor uba ïoh jingkyrshan na kiba kham samla bad ki nongtrei party ki bym da paw khmat than.
Kiba bun bah ruh ki dkhot bad nongkyrshan ka Congress ki kwah ba u Tharoor un shah jied namar ki ong u dang kham khlaiñ ka met bad ka jingshemphang ruh kaba ïar bad u long ruh uba biang bha namar ïa lade u lah ban jop ilekshon wat hadien ba kiba bun ki MP Congress ha u snem 2024 bad 2029 ki rem kput ha ki kyrtong ka seng BJP ym kum u Kharge uba la rem ïa ka ilekshon.
Don pat kiba ong ba u Kharge ba kum u briew uba la don ha ka kam saiñ pyrthei la 50 snem u tip kham bha bun hajar shah ban ïa u Tharoor uba bsuh khlieh dang ha u snem 2009 sha ka saiñ pyrthei bad uba dang shu wanphai na sha bar ri ruh dang ha u snem 2008.

Leave A Reply

Your email address will not be published.