Hato ka party NPP ka don hok ban pynlong rynsan saiñpyrthei ha ka prokram ka Sorkar?: HYC

Shillong, Risaw, 02: Ka Hynñiewtrep Youths Council (HYC) ka la kynthoh tyngeh ïa ka National Peoples Party kaba ïalam ïa ka sorkar synrop Meghalaya Democratic Alliance halor ka jingteh ïa ki lama jong ka party ha ka jingbuh mawnongrim jong u Myntri Rangbah ha ka 30 tarik u bnai baladep ban shna noh ïa ka surok Nongstoiñ-Maweit.
“Ha ka 30 tarik, Nailur, 2022, ha ka Official Facebook page jong ka NPP la thoh, “la buh ïa u mawnongrim jong ka surok Nongstoiñ-Maweit” ba la don lang da u Myntri Rangbah ka Jylla u Conrad Sangma bad kiwei kiwei ki dkhot jong ka Ingdorbar Thawaiñ bad ka Khasi Hills District Council, kiba dei na ka seng saiñpyrthei NPP. Ha kane ka Facebook Page la thep ruh ïa ki dur jong kane ka jingïalang kaba pyni ïa u Myntri Rangbah bad kiwei kiwei ki kynrem ki lyndan,” la ong ka Seng ha u kyrwoh ba la phah da u General Secretary u Bah Roy Kupar Synrem.
“Ngi sngewkmen ba ki paidbah ka shnong Maweit bad ki shnong kiba marjan kin ïoh ïa kane ka surok. Hynrei, kaei kaba la jia ha kane ka por lane hadien ka prokram ha kane ka jaka, ka pynmih bun ki dak jingkylli ïa kaba ki nongshong shnong jong ka jylla ki donkam ban ïoh jubab,” la ong seng.
“Katkum ka Facebook Page, la sakhi ïa ki phew tylli ki lama jong ka National People’s Party ha kane ka jingïalang bad wat ha ka rynsan ba la mang kyrpang ban shong ki kynrem ki lyndan bad ki nongïalam jong ka Party la teh da ki lama jong ka NPP. Kane rynsan pynlong jingïalang ka dei kaba la pyndonkam ban buh ïa u mawnongrim bad ban pynlong ïa ka jingïalang jong ka party. Mynta ka jingkylli ka mih, hato ka party ka donhok ban pynlong rynsan saiñpyrthei ha ka prokram jong ka sorkar lane na kano ka daw la pynlong ha kane ka kajuh ka jaka ba la pynlong ïa ka prokram ka Sorkar? la buh jingkylli ka HYC ïa ka NPP.
“Hato kane kam dei ka jingpyndonkam bakla ïa ka bor da ka seng saiñpyrthei kaba ïalam ïa ka sorkar synrop? Ngi sngew ba ka jingpynlong saiñpyrthei ïa ki projek ka sorkar ba la mang na ka bynta ka jingmyntoi jong kiba bun ki shnong da kawei ka seing saiñpyrthei ka dei ka buit pyrshang ban pynbiej ïa ki nongshong shnong jong ka thaiñ tang ban ïoh khroh vote,” la kynthoh shuh shuh ka Seng.
“Ka long kaba sngewsih ba u Myntri Rangbah uba mihkhmat ïa ka Jylla baroh kawei bad ban trei na ka bynta ka bha ka miat jong ki paidbah ha ka rukom ba noh shiliang ka tarajur, ban shu pyndonkam ïa ka rynsan jong ka Sorkar ban pynlong iew na ka bynta ka seng saiñpyrthei jong u. Kane ka dei ka bym lah satia ban pdiang daleilei bad dei ban pynrem lang da baroh,”kynthoh ka HYC.
“Ban pynbha ïa ki jingshna na ka bynta u paidbah bad na ka bynta ka roi ka par jong ka jylla ka dei ka jingkitkhlieh ba hakhmat eh jong kano kano ka sorkar. Ka pisa ba la mang na kabynta ki projek ka dei kaba la siew da u paidbah bad ym da kano kano ka seng saiñpyrthei. Lada ka dei ka pisa kaba la mang na ka pla tyngka jong ka seng saiñpyrthei, ngim don eiei ban kynthoh. Hynrei ka pisa ba la siew khajna da u paidbah kam shym mut satia ba ki seng saiñpyrthei ki lah ban put turoi katba ki mon,” la ong ka Seng.
Shuh shuh ka HYC ka la kynthoh ruh ba ka jingsieh ïa ki lama jong ki seng saiñpyrthei ha kino kino ki prokram ka Sorkar ka pynpaw ba kane ka Sorkar ka leh tang ban ïoh jingmyntoi ka party. “Ngi pynrem jur ïa ka jingpyrshang jong ka NPP lane wat ïa kino kino ki seng saiñpythei kiba don ha ka bor, ban shu pynlong saiñpyrthei ïa ki kam pynroi ha ka jylla bad ban ïalam bakla ïa ki paidbah lyngba ki lama jong ka party,” la takraiñ ka HYC.
Ka HYC ka la pynpaw ba kan ïai bteng ban pynsawa ïa ka sur pyrshah ïa kano kano ka jingleh bymhok jong ka Sorkar bad ka la maham ruh ïa ki seng saiñpyrthei kiba don ha ka bor ba kim dei ban pynlong saiñpyrthei ïa kino kino ki projek ha ki sngi ki ban dang wan bad bynrap ruh ba ka seng kan sa nang peitngor bad shim ruh da ki lad ki lynti kiba tyngeh lada kum kine ki jingjia kin dang jia nangne shakhmat.