Rah ka PFR, Shangbangla SC bad ka Umsning Proper A ïa ka Sunfeast Cup 2022 Meghalaya Master

Nongpoh, Risaw 02 : Ka kynhun PFR jong ki kynthei haka kyrdan U-16, ka Shangbangla SC ki shynrang haka kyrdan U-13, bad ka Umsning Proper A ki shynrang haka U-16 kila long ki lai tylli ki kynhun kiba la ioh ban rah ïaka nam lahduh haka phainal jong ka Sunfeast Cup 2022 Meghalaya Master bala pynlong da ka Lynti Jam Welfare Development Association haka jingïatreilang bad ka SPT Sports Bangalore ha madan ïalehkai ka shnong Jyntru.
Ïa katei ka lympung la bei pisa da ka SPT Sports Management Pvt. Ltd kaba dei ka kompani na Bangalore naka bynta ban kyntiew ïa ka kam ialehkai phutbol bad ban sei madan iaka sap ka phong ki samla bad khynnah ba don sap ha kaba 51 tylli ki kynhun na kylleng ka jylla kila wan ban ïa shim bynta shitrhem kynthei bad shynrang bala phiah haka kyrdan U-13 naka bynta ki shynrang bad U-16 naka bynta ki kynthei bad shynrang.
Lyngba katei ka jingjop kitei ki 3 kynhun kin sa leit ruh ban mih khmat ïaka jylla kum ki kynhun ‘Meghalaya Masters’ sha ka Northeast Sunfeast Cup 2022 ka ban sa long shen ha Nongbah Guwahati naka bynta ban aireng pat bad kiwei ki kynhun naki jylla bapher bapher jong ka thaiñ shatei lam mihngi.
Ïa katei ka Sunfeast Cup 2022 la wan ban pynhap pyrda noh haka sngi Saitjaiñ da u Bah Primson Makdoh kum u kongsan haka jing don lang u Aibor Khongjee uwei naki rangïalehkai phutbol ba paw ka jylla, Bah M Tongper ADC ka Ri Bhoi, Bah PB Sylliang, Bah Sumar Swer President ka LJWDA bad kiwei kiwei ki riew rangbah.
Haba phai sha ka jing ïakhun phainal ha katei ka sngi ka jing ïalehkai ba nyngkong kala long hapdeng ki kynthei kiba hapoh ka 16 snem ka rta, hapdeng ka kynhun PFR pyrshah ïaka Lynti Jam Welfare Development Association ha kaba ka jing ïakhun kala long kaba itynnad bad shongshit bha da ka jing ïa risa bad ai ka jingkyrshan ba shitrhem jong ki paidbah, ha kaba ki thei ïalehkai na baroh ar tylli ki kynhun kila sei bad pyni shisha ïala ki jong ki sap ki phong jong ki ban pyni ba kim duna shuh haka kam ïalehkai phutbol, bad hapdeng ka jingiakhun ba jur ka PFR kala lah ban pynliem noh ïaka LJWDA da 1-0 kol ban rah syndon ïaka nam lahduh jong katei ka lympung.
Ka jingïakhun ba ar ha katei ka sngi kala long hapdeng ka Shangbangla SC prshah ïaka Eleven Brothers jong ki U-13 Boys ha kaba ka jingïakhun hapdeng kitei ki ar kynhun la sakhi ba ki khynnah ïalehkai na baroh ar tylli ki kynhun kidei kiba tbit, bad hapdeng ka jingiakhun kaba jur, ka Shangbangla SC kala lah ban pynliem noh ïaka Eleven Brothers da 1-0 kol.
Ka jingïakhun ba khatduh ha katei ka sngi kala long hapdeng ka Umsning Proper A pyrshah ïaka Brothers United jong ki U-16 Boys, kaba dei ruh ka jingïakhun kaba itynnad bad shong shit bha da ka jing ïalehkai bha ki rangïalehkai na baroh ar kynhun ban pyni bad sei ïaka sap ka phong kaba ki don, hapdeng ka jingïakhun kaba jur naduh ka kylla step haduh ka kylla miet kitei ki kynhun kila ioh ban thep mar 2 kol kaba la kut noh hapdeng ka jingïakhaid ha kaba naka liang ki referee kila rai ban pynlong da ka jingshut tie breaker bad dei haka jingïashut tie breaker b aka Umsning Proper A kala lah ban pynliem noh ïaka Brothers United da 4-2 kol ban rah syndon ïaka nam jop.
Kum ka jing pynshlur bad ai mynsiem ïaki samla ialehkai, naka liang ka Lynti Jam Welfare Development Association ryngkat bad ka SPT Sports Management Pvt. Ltd kila sam ruh ïaki khusnam da ka trophy sha ki kynhun ba jop bad kumjuh kiba rem ryngkat ki khusnam shimet.