Ka jingïadei ki kmie ki kpa bad ki khun haïing hasem

0

Ka ïing kadei ka Shlem ba nyngkong eh jong kano kano ka jaitbynriew. Kadei ka nongrim bad u rishot ba khlaiñ tam ha ka imlang sahlang. Lada bakla naïing shabar ruh la bakla. Bunsien la ju ong ba ïa ka jinglong u briew lah ban ithuh na ka longïing kaba u wan. Ïa ka ïing la ju ong ruh ba kadei ka skul ba nyngkong ïa u briew.
Ha kaba kum kine ki por ba ka imlang sahlang, ka akor ka burom bad ka long riew manbriew ka la hiar haduh katta katta, ka imlang sahlang ka phai bad peit sha ka longïing longsem, aiu ki leh ban pynbha pat ïa kaba la sniew. Ha ka Jaidbynriew Khasi, kaba ju burom bha ïa ka ïing ka sem, ka jingïakren ha kine ki sngi, ka long ba ki longïing longsem, ki la hiar shaba palat bad dei namar kane ka daw ba mih ki jingsniew ba laiphew jait bad ka imlang sahlang ka la nang jyrsieh.
Ki kmie ki kpa, ki nonghikai, ki nongsynshar ki ud ki lynñiar ïa ki jingeh ba ki ïakynduh ban teh lakam ïa ki khun ki kti. Bun ki la ïoh mon bad kim kheiñsnep shuh ïa ki jong ki kmie ki kpa. Shano ki wan shano ki leit, kim tip shuh. Kiei ki paralok ba ki ïa ïaid bad leit jingleit ruh ym tip shuh. Ha ïing hasem ym lap par shuh ban ïakren bad ki, namar ba ki wan ïing ynda la miet bad lada don haïing ruh la lapmiet satang ka peit mobile. Hynrei haba kine ki jingeh ki wan jia, ym lah ban shu kohnguh tang ïa ki khun hynrei ki kmie ki kpa ruh kin hap shim ïa kajuh ka jingkitkhlieh ba ki ruh, ki long ka daw ka jinghiar dor ka imlang sahlang.
Ki kmie ki kpa ki la bunkam palat ha ki kam ki jam jong ki bad ailad ba ki khun kin synshar halor jong ki. Ki don ki ïing kiba ki kmie ki kpa ki la aili shaba palat ïa la ki jong ki khun, kat haduh ba kin da kiew syndon halor jong ki. Katno ngut na ki kmie ki kpa kiba pynkut por mynstep bad mynmiet ban sneng ban kraw ïa ki khun ki kti, khamtam lei lei ynda ki la heh la san. U khun uba la leit college u ïoh lut kat kaba u ang. Tang ka B.A ruh ym pat pass, u la wan dha klas da ka bike, ka maruti. Katba ynda kylli kaei ka laiñ kaba u kwah ban leit, ka jubab ka long ‘Ngam Tip’. Hooid ym ong ba pynrem ïa kine kiba don bike don maruti, hynrei kaei pat ka lawei jong ki lane kaei ka kam kaba kin trei kim tip. Ki khun kynthei ki leit klas naduh ka por 10 baje mynstep ki wanphai haduh 8 baje mynmiet, ki kmie ki kpa kim salia ban kylli, shano ki wan shano ki leit. Ynda kynduh lei lei sa ki khun ba kham leh laitlan hangta keiñ ka jingjot ka nang wan nang wan. Wat ynda kylli makna ki kmie ki kpa, ki khun ki jubab “wan party” ki kmie ki kpa ki hun beit.
Ka jingïakren shaphang ka jingïadei ki kmie ki kpa bad ki khun haïing hasem kadei ka mat kaba khluid bha ha kine ki sngi ba mynta. Balei? Kadaw ka long ba kiba bun hi ki ïohi ba ka jinghiar ka imlang ka sahlang bad ka akor ka burom ha kine ki sngi ba mynta, kadei namar ba kam don shuh ka jingïadei kaba jan lane ka jingïashongkai hapdeng ki kmie ki kpa bad ki khun ki kti. Wat haduh ka pule ka dangle ruh, ki kmie ki kpa naduh ba ki khun ki dang leit klas K.G ki la shanniah beit ha ka tuition. Ban ïakren lei lei ïa ka jingbtin lynti ym don shuh. Dei namar kane ka daw ba kiba bun ki samla kiba la pass ki kut tang ha ka wad kam sorkar. Ki kmie ki kpa kim ju pyni lynti lypa ïa ki khun katba ki dang don ha ka jingpule.
Ym lah ban Len ruh ba wat hapdeng ki briew ba treikam bhalang ruh, ka longïing longsem jong ki ruh kadei kaba la jot la pra ne ka bym don ka jingïasngewthuh jingmut shiïing shisem. Lada kiba kum kine ki briew ki trei kam bhalang, jynjar shibun ban ka imlang sahlang kan bha, lada ïa ka ïing ka sem lajong ym lah ban synshar, kumno pat yn synshar ïa ka imlang sahlang. Ka por ka la dei ba kum ka Jaitbynriew tip briew tip Blei ban ïakyndit thiah noh bad phai noh shuwa sha la ki ïing ki sem lajong, hadien kata ngin sa ïakner sa sha ka imlang ka sahlang.

Leave A Reply

Your email address will not be published.