Pynkup burom ka company Max Cement ïa ki rang ïalehkai bad u coach jong ka Mihmyntdu RC Eve Senondary School

Khliehriat, Risaw 02 : Ka company dewbilat, ka Max Cement Ltd kaba don ha Nongsning East Jaiñtia Hills District, myn ha ka 30 tarik jong u bnai nailurka ka pynkup burom ïa ki rang ialehkai football, jong ka skul Mihmyntdu RC Eve Senondary School, ïa u coach bad nonghikai kiba la lah ban poi sha ka Quarter Final ha ka Subrato Mukherjee Cup kaba long ha ka nongbah Delhi.
Ha ka jingïalang ba la pynlong ha Max Cement, u Managing Director jong katei ka company, u la ai ka jingkhublei bad ki kyntien jingpynshlur ïa ki rang ialehkai jong katei ka skul ba kin nang lah ban ïaid Shaphrang ha ka kam ialehkai , u la ai khublei ruh ïa u coach bad ki nonghikai kiba ju kyrshan ïa ki khynnah na ka por sha ka por bad ai mynsiem ruh ïa ki khynnah ba kin don ka mynsiem ialeh ban poi sha ka thong.
U tei u MD jong ka Max Cement u la punshlur ïa ki rang ialehkai ba kim dei ban sah tang hapoh ka jylla hynrei da ka jingkitbok kitrwiang u ong ba ki dei ruh ban mih shabar ka jylla bad shabar ri, u kular ruh ba un ai ka nongkyrshan ïa ka kynhun ki rang ialehkai.
Ha katei ka jingïalang la pdiang burom ïa ki rang ialehkai, u coach bad ki nonghikai da ki jaiñ Assamese gamcha bad uwei na ki nongtrei mon sngewbha, u bah Elnathan Pale, u la ai ïa ki jingiarap da ka khung pisa ïa ki rang ialehkai bad ki bor pynïaid skul.
“Ban poi sha ka thong dei ban don ka jingkut jingmut kaba skhem, ban trei shitom, ban leh adkar bad ban don ka mynsiem ïaleh”pynkut u kyrwoh na ka Max Cement, Nongsning East Jaiñtia Hills District.