ïoh nongkitkam thymmai ka Hynñiewtrep National Youth Front Pyndenlyngdoh Unit

Mawkyrwat, ‘Nailur, 29: Ka Hynñiewtrep National Youth Front (HNYF) jong ka South West Khasi Hills District ka don ïa ka thong ban nang pynïar ïa ki shnad treikam jong ka hapoh u pud u sam jong ka South West Khasi Hills District namar katba nang mih ki sngi ki por bad ruh namar ka jingkynrei bad ka jingnang kiew syndet ki kam sniew kiba ktah mat ïong ïa ka longbriew manbriew la ka long ha ki shnong ki thaw bad ha ka don ka thaiñ hi baroh kawei.
Kumta, ka HNYF jong ka South West Khasi Hills District ha kine ki khyndiat sngi ka la hiar ha shnong Pyndenlyngdoh bad la ïoh ban thaw sa kawei ka unit kaba thymmai kaba dei jong ka Pyndenlyngdoh Unit ha kaba u la jied President ïa u Thomborlin Syiemlieh, Vice President u bah Wanborlin Kharsyiemlieh, General Secretary u ban Wankloilin Khyllem Kharai, Assistant Secretary u Ibanjoplang Shylla, Finance Secretary u Jonweltonroy Kharhari, Sports Secretary u Spriminroi Khyllem Kharai ryngkat ruh ki 7 ngut ki dkhot.
Ïa kitei ki nongkitkam ba thymmai jong ka seng la ïoh ban pynskhem da u Vice President jong ka HNYF, South West Khasi Hills District, u bah Shining Wanniang bad bud ruh ki kyntien jingkyrkhu kyrdoh.
Ha kane ka sngi la ïoh ruh ka jingkren lyngkot na u Working President, u bah Shimbor Langte ha kaba u la kren ïa ka jingïaid lynti jong ka seng bad kumjuh ruh ki rukom treikam bad ki mat ba ka seng ka don khamtam eh ïa ki mat kiba ktah ïa ka ïap ka im jong u paidbah.