Nongpoh, Nailur 24: Kawei naki lympung ïalehkai phutbol ba heh tam ha Ri-Bhoi bala tip kum ka 1st Damanbait Lamare Knock Out Football Tournament kaba 3 lakh ka khusnam bala pynlong da ka Umroi Block National People’s Youth Front kala sdang mynta ka sngi hapdeng ka jingiphuh iphieng ha madan Umroi Nongrah.
Ia katei ka lympung la wan ban plie pyrda da u Bah Dasakhiatbha Lamare Myntri ka tnad Transport ka jylla kum u kongsan haka jingdonlang u Bah Damanbait Lamare kyrtong ka NPP na Umroi, Bah Ngaitlang Dhar MLA barim ka Umroi, Bah Pynhun Rynghang General Secretary ka NPYF haka jylla, Rishan Lyngdoh President NPYF Umroi Block bad kiwei kiwei ki riew rangbah. Ka jingialehkai plie pyrda ha katei ka sngi kala long hapdeng ka Pahamrioh FC pyrshah iaka Iatylli FC ha ka ba ka jingiakhun kala long kaba shongshit bad itynnad bha ha ka ba ki rangialehkai na baroh ar kynhun kila ialehkai bha bad hapdeng ka jingiakhun ba jur naduh ka kylla step haduh ka kylla miet ka Pahamrioh FC kala lah ban pynliem noh ia ka Iatylli FC da 3-1 kol ban rah syndon ia ka jingjop ba nyngkong jong katei ka lympung.
Ka jinglehkai ban wan kan long haka 1 tarik Nailur hapdeng ka Sohkyndur FC pyrshah iaka Ezeriel FC haka por 1 baje noh phai sngi
