Nongpoh, Nailur 22: Ka prokram ai jinghikai ba 12 sngi halor kumno ban phikir bad khamtam ban ai jingïarap haka por ba lyngshop mariang lyngba ka skhim Upscaling Aapda Mitra kala sdang biang ha Ri-Bhoi District naka bynta ban jied bad ai jinghikai ïaki samla ba kyrpang (Community Volunteer) kaba dei ruh ka sien ba ar kala sdang biang haka 19 tarik mynta u bnai ha State Institute of Rural Development (SIRD) Nongsder.
Ïa katei ka prokram la plie paidbah da u Bah BJ Kharshandi ADC cum CEO ka DDMA, Ri-Bhoi District, haka jingdonlang ka kong K Wanniang DDMO, Dr. M Kharkongor Consultant DDMA bad katei ka prokram ai jinghikai kan sdang naduh ka 19 tarik Nailur haduh 1 tarik Risaw bad ha katei ka prokram kumba 33 ngut ki samla naki shnong bapher bapher kila wan ban shim bynta.
Ka kong K Wanniang DDMo haba kren maitphang ha katei ka sngi kala pyntip b aka thong jong katei ka prokram ka long ban ai jinghikai sha ki Community Volunteer khnang ba kin lah ban tem bad ban ai jingïarap haba don kano kano ka jinglynshop mariang bad kala pyntip ruh ki don tang 5 tylli ki district kiba la shah jied ban pyntreikam ïa katei ka skhim haka jylla bad naka liang ka sorkar ka buh thong ruh ban ai jinghikai kumba 100 ngut ki Community Volunteer naki shnong bapher bapher.
U Bah BJ Kharshandi haba kren ha katei ka sngi kum u kongsan u pynshai ba katei ka skhim ka dei ka skhim jong ka sorkar kmie bala bei tyngka da ka National Disaster Management Authority (NDMA) bad katei ka skhim yn pyntreikam ruh ban ai jinghikai sha ki katto katne ngut ki samla kiba la shah jied naki shnong bapher bapher ban ai jinghikai halor kumno ban leh haka por ba wan lynshop mariang ban pynduna ïaka jingiap briew, kaba long ruh ka jingmyntoi kaba khraw ïaki samla ban don ha katei ka prokram ai jinghikai ban long kum ki nongïarap ba hakhmat eh.
U la ong ruh hadien ba ki samla kila pyndep ïaka jinghikai yn sa ai ruh ïaki syrnod, ki tiar ïada kum ki Life Jacket, First Aid Kits, bad kiwei kiwei.
