Rai ka JAC ban pynlong da ka jingïathir jingmut halor ka jingpyrshah ïa ka Casino ha Ri Bhoi
Nongpoh, Nailur 21: Ban bteng ka jingpyrshah ïa ka jingthmu ban wan rah ïa ka ktem khalai ha Ri Bhoi ha ki thaiñ Khanapara, ka Joint Action Committee Against Casino ka la rai ban pynlong da ka jingïathir jingmut halor ka jingpyrshah ïa ka jingwan ka Casino ba ka JAC ka la rai ruh ban khot ban wer ïa ki riew pawkhmat bad kumjuh ruh ki MLA bad MDC ki nongïalam niam bapher bapher bad ki Principal jong ki skul na Ri Bhoi.
Kum ban pynkynmaw, ka Joint Action Committee Against Casino ka dei ka kynhun ba la synrop lang da ka Synjuk ki Rangbah Shnong Ri Bhoi District, ki nongïalam Seng Bhalang ba kynthup ïa ka KSU, HNYF bad ka FKJGP na Ri Bhoi District bad ka jingthmu ba la seng ïa kane ka JAC ruh ka long ban pyrshah jur ïa ka jingthmu ban wan rah ïa ka Casino ha Ri Bhoi District.
Kumba la pyntip da u nongai ktien ka JAC Against Casino bad uba dei ruh u President ka KSU North Khasi Hills District Unit, u Samla Ferdynald Kharkamni, u la pyntip ba ka JAC naduh ba sdang ka la mih ban pyrshah halor kane ka jingthmu ban wan rah ïa katei ka ktem khalai ba la tip kum ka Casino ha Ri bhoi bad haduh mynta ruh kin ieng ha ka nongrim ban pyrshah ba lada ka sorkar kam sangeh kin sa mih ban pynlong da ka jingpyrshah ki paidbah ryngkat ki nongïalam ka JAC.
U la ong ruh kumba ka la JAC ka la mih ban pyrshah ïa katei ka Casino, na ka liang ka JAC ka la rai ruh ba shim ïa ka sienjam ban pynlong pat da ka jingïathir jingmut bad ha kane ka jingïathir jingmut ka JAC kan khot kan wer naduh ki MLA, MDC ka Ri Bhoi, ki nongïalam niam bad kynthup ruh ki riew pawkhmat na ka bynta ban ïa tai bad ban ïathir halor kane ka mat ba ka JAC ka pyrshah jur ïa ka Casino.
U la ïathuh ba ïa kane ka jingpynlong ïa ka jingïathir jingmut halor ka Casino ka JAC ka la rai ban pynlong ha ka 26 tarik u Nailur 2022 naduh ka por 10 baje mynstep ha Ing Dorbar, Sajer Nongpoh bad kum ka JAC ka khmih lynti ruh ba ki MLA, MDC bad ki nongïalam niam bapher bapher kin wan ban shim bynta ban paw ïa la ki jingsngew halor kane ka Casino ba ka JAC ka la mih ban pyrshah naduh ba sdang ban wan rah ha Ri Bhoi District, u la bynrap.