Shillong, Nailur 15 : Ka shi kol ba la thep da u Henry F Nongneng ka la ïoh ban pynhiar mynsiem ïa ka Shillong Lajong FC ha kaba ka la lait da ka said na ka jingshah pynhiar kyrdan hadien ba ka la jop ïa ka Mawkhar SC da 1-0 ha ka jingïalehkai kaba la ïaid 50 sien jong ka lympung ïalehkai OC Blue Shillong Premier League 2021-22 hynne ka sngi Palei ha madan Third Ground, Polo, Shillong.
Lyngba ka jingjop jong ka Shillong Lajong, ka Malki SC bad ka Mawkhar SC ki pyndep ha ka liang jong ka jingshah pynhiar kyrdan na ka SPL. Baroh ki team ki sah satang mar shisien ïalehkai, ka Shillong Lajong FC ka la kamai 14 poiñ, ka Malki 10 bad ka Mawkhar 6 poiñ. Ha ka 11 tarik Naitung ka Shillong Lajong FC ka la pynliem da 2-1 kol pyrshah ïa ka Mawkhar SC.
Haba phai sha ka jingïalehkai hapdeng kine ki ar tylli ki team ha ka sngi Palei, ka jingïalehkai ka long kaba mar ïabam ha kaba baroh arliang ki khlem lah ban thep kol wat haduh kaba kut jong ka kylla step.
Haba wanphai sha ka kylla miet, ka Lajong ka la ïoh shibun ki corner bad ki jingshut free-kick hynrei baroh ki shu kut tang ha ka jingpyrshang thep kol.
Hapdeng ka jingïalehkai kaba ïakhaid bha bad la i kumba kine ki ar tylli ki team kin kut da kaba ïakhaid khlem da don ba thep kol. Pynban hapdeng ka jingïalehkai kaba ïathnem bha, u Henry F Nongneng u la ïoh ban pynkhih jar da kaba pyndep da ka khlieh kaba la wan lyngba ka jingshut corner na u Samuel K Vanlalpeka.
Katei ka shi kol kam pat pynhun ïa ka kynhun ha kaba ki la ïakhun tyngeh ban ïoh thep kol pynban ka Mawkhar ruh khlem da ailad ka la ïakhun tyngeh ban ïoh pynphai hynrei haduh kaba kut jong ka jingïalehkai ka Shillong Lajong FC ka la jop salit bad lait na ka jingshah pynhiar kyrdan.
Ka jingïalehkai mynta ka sngi Thohdieng kan long hapdeng ka Ryntih SC (17 poiñ) pyrshah ïa ka Langsning FC (22 poiñ) ha ka por 3:15 baje janmiet. Ha ka kylla kaba nyngkong, baroh ar ki la ïakhaid da 1-1 kol.
